इटहरी/ ‘अलिखित नियमहरूमा आधारित कथा’ भन्दै साउन २३ गतेदेखि देशभर प्रदर्शनमा आउने तयारीमा रहेको फिल्म ‘मोहर’ को नयाँ पोस्टर सार्वजनिक गरिएको छ । पोस्टरमार्फत नै दर्शकमाझ कौतुहलता बढाउने प्रयास गरिएको छ, जसमा मुख्य कलाकार पल शाहलाई दुई फरक रूपमा देखाइएको छ ।एकातर्फ उनी लामो कपालमा नायिका वेनिशा हमालसँग प्रेमिल अँगालोमा देखिन्छन् भने अर्कोतर्फ छोटो कपालमा नायिका नीति शाहसँग रोमान्टिक दृश्यमा देखिन्छन् ।
यस्तो दोहोरो रूपले फिल्ममा पलको दोहोरो भूमिका हुनसक्ने अड्कल दर्शकमाझ चल्न थालेको छ । फिल्मका लेखक तथा निर्देशक ओम प्रतिक हुन् भने निर्माणमा चुम्बन जंग शाही छन् । फिल्मको टिजर जेठ २७ गते सार्वजनिक गरिने जानकारी दिइएको छ, जसपछि कथाको थप पाटो प्रस्ट हुने निर्माण पक्षको भनाइ छ । फिल्ममा पल शाह, वेनिशा हमाल र नीति शाहसँगै अर्जुन जंग शाही, मिथिला शर्मा, रवीन्द्र झा, लक्ष्मी गिरी र बाल कलाकार सारा शर्माको पनि मुख्य भूमिका छ ।
दिपेन बस्न्यातको छायांकन, कुमार महर्जनको एक्सन, सुरेश अधिकारी र एसडी योगीको संगीत तथा प्रमोद ढुंगाना र हर्क साउदको शब्दले फिल्मलाई प्राविधिक रूपमा बलियो बनाउने विश्वास गरिएको छ । गिरिराज घिमिरे मुख्य सहायक निर्देशकको रूपमा रहेका छन् भने लक्ष्मण राज पौडेल निर्माण नियन्त्रकको भूमिकामा छन् । फिल्म मेकर्स प्रा.लि.को ब्यानरमा तयार भएको ‘मोहर’ले पोस्टरमार्फत नै दर्शकलाई कथाभित्रको रहस्यमा रुमल्याएको छ ।
@parikalanewsofficial
Discussion about this post