फिल्म ‘अभिमन्यु’को आजबाट सयदिने रिलिज काउन्टडाउन सुरु

इटहरी/ तराईको गन्ध र मधेसी समुदायको जीवनशैली झल्काउने पोस्टरसँगै ‘अभिमन्यु : च्याप्टर–१’ले आफ्नो रिलिज काउन्टडाउन सुरु गरेको छ । निर्देशक सुशान्त गौतमको निर्देशनमा बनेको यो फिल्म आगामी भदौ २७ गतेदेखि सार्वजनीक प्रदर्शनमा आउँदै छ भने सार्वजनिक गरिएको पोस्टरअनुसार अब फिल्म प्रदर्शनमा आउन आजका मितिले ९९ दिन बाँकी छ ।

पोस्टरले फिल्मको कथा ग्रामीण मधेसको परिवेशमा घुम्ने संकेत गर्छ । धानबारीको फाँट, केराको बगैंचा र सरकारी स्कुलको पोसाकमा रहेकी बालिकालाई किताब कपी बोकेर एक युवकले स्कूलतर्फ लैजाँदै गरेको दृश्य मार्फत एक संवेदनशील सामाजिक सन्देश लुकाइएको देखिन्छ । ती पात्रहरू मधेसी समुदायका हुन्, जसले फिल्मको भूगोल र विषयवस्तु दुवैलाई स्थापित गर्छन् ।

हाल पोस्टप्रोडक्सन चरणमा रहेको फिल्म युनिटले कथाबारे अझै खुलाएको छैन, तर थिम पोस्टरले पैसाको लोभमा फसिने मान्छे र त्यहाँबाट बाहिर निस्कन गरिने संघर्षलाई फिल्मको मूल मर्म बनाएको स्पष्ट सङ्केत दिन्छ । सरिता गिरी, गौमाया गुरुङ, लक्ष्मी बर्देबा, शिशिर वाङ्देल, किरण श्रेष्ठ, प्रकाश दाहाल, कामेश्वर चौरासिया र सुष्मा निरौला फिल्मका प्रमुख कलाकार हुन् । सेभेन सिज सिनेमाको प्रस्तुति रहेको फिल्ममा मुकेश खनालको लेखन, मदन थापाको क्रिएटिभ निर्देशन रहेको छ । थापाले यसअघि ‘बाटो : रोड टु डेथ’ निर्देशन गरेर चर्चा बटुलेका थिए ।

@parikalanewsofficial

विनोद पौडेल र गुञ्जन गिरी निर्माता रहेका फिल्ममा रमेश चौलागाई र हरि श्रेष्ठ सह–निर्माता छन् । कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ छन् । शरद महतोको डिओपी, मदन घिमिरे सम्पादक, आकाश उखेडा मुख्य सहायक निर्देशक, जीवन शाक्य लाइन प्रोड्यूसर र सरोज श्रेष्ठ निर्माण नियन्त्रकको रूपमा रहेका छन् । यो फिल्मलाई नेपाली र हिन्दी दुवै भाषामा विश्वभर एकसाथ रिलिज गरिने निर्माण युनिटको तयारी छ ।