इटहरी/ नेपाली फिल्म उद्योगमा विक्रम संवत् २०८२ को ऐतिहासिक सफलता फिल्मको अग्रपङ्क्तिमा उभिएको छ ‘ऊनको स्वीटर’। आम दर्शकदेखि समालोचकसम्मको मन जित्न सफल यो फिल्मले केवल बक्स अफिसमा रेकर्ड मात्र तोडेको छैन, नेपाली कथावस्तुलाई अन्तर्राष्ट्रिय स्तरमा समेत गर्वका साथ प्रस्तुत गरेको छ । प्रदर्शनको चौथो सातामा पुगेको अवस्थामा पनि यो फिल्मको क्रेज घटेको छैन ।
तेस्रो हप्तामै १० करोडभन्दा बढीको ग्रस कमाइ गर्दै सुपरहिट बनेको यो फिल्मको सफलतालाई विशेष बनाउन निर्माण टिमले मङ्गलवार साँझ काठमाडौंको चाबहिलस्थित एफक्युब सिनेमा हलमा दर्शकसँग केक काटेर उत्सव मनायो । सो अवसरमा निर्देशक नवीन चौहान, कलाकार विपिन कार्की, एलेक्स पारस, परीक्षा लिम्बु, शारदा देवी सिलवाल, भावना खपाङ्गी मगर, संगीतकार कोविद बज्र, गायक सुजन चापागाईं, गीतकार हर्क साउद, छायाँकार चिन्तन राजभण्डारीलगायतको उपस्थिति थियो ।
केकमा फिल्मका पोस्टर तथा फिल्मको लोकप्रिय गीतहरू झल्काउने चित्रहरू सजाइएका थिए । निर्देशक चौहानका अनुसार यो कुनै प्रचारात्मक रणनीति नभई “दर्शकको माया साट्ने र धन्यवाद व्यक्त गर्ने” सन्देशसहितको आत्मीय कार्यक्रम हो । एफक्युब हललाई गोलाप्रथामार्फत छानिएको थियो, जहाँ हल प्रायः हाउसफुल देखिएको थियो । ‘ऊनको स्वीटर’ हाल नेपालका १०० भन्दा बढी स्क्रिनहरूसँगै अमेरिका, अस्ट्रेलिया, जापान, दक्षिण कोरिया, युरोप, मध्यपूर्वलगायतका देशहरूमा समेत प्रदर्शन भइरहेको छ ।
@parikalanewsofficial
विपिन कार्की, मिरुना मगर, परीक्षा लिम्बु, एलेक्स पारस, विल्सन विक्रम राई, सुरज तमु, भावना खपाङ्गी मगर र सुनिल पोखरेलको अभिनयले कथालाई थप गहिरो बनाएको छ । फ्रेन्च निर्देशक एरिक भ्यालीले फिल्मलाई ‘नेपाली समाज र संस्कृतिको संवेदनशील प्रस्तुति’ भनेर खुलेर प्रशंसा गरेका छन् । मनीषा कोइराला, डा. बाबुराम भट्टराई, राजेश पायल राई, विजय लामा, नाजिर हुसेनजस्ता चर्चित हस्तीहरूले पनि यो फिल्मको खुलेर प्रशंसा गरिसकेका छन् ।
Discussion about this post