‘मिस एण्ड मिसेस रोयल ग्लोबल क्विन’ सम्पन्न, दिपा क्षेत्री र सारिका बुढा विजेता

ईटहरी/ सौन्दर्य, आत्मबल र प्रतिभाको उत्कृष्ट संगम बनेको ‘मिस एण्ड मिसेस रोयल ग्लोबल क्विन नेपाल २०२५’ भव्यतापूर्वक सम्पन्न भएको छ । विवाहित र अविवाहित महिलाबीचको यो सौन्दर्य प्रतियोगिता आइतबार साँझ काठमाडौंको जमलस्थित राष्ट्रिय नाचघरमा सम्पन्न भएको हो, जहाँ मिस र मिसेस तर्फ गरी चार विजेताहरूको घोषणा गरियो ।

अविवाहित तर्फ (मिस) दिपा क्षेत्रीले उपाधि हात पार्दा, मेरिता पोखरेल फर्स्ट रनरअप बन्न सफल भइन् । विवाहित तर्फ (मिसेस) भने सारिका बुढाले उपाधि जितिन् भने सिर्जना राई फर्स्ट रनरअप घोषित भइन् । प्रतियोगिताको आयोजना शाह स्टुडियो एण्ड कम्पनी प्रा.लि. ले गरेको हो । संस्थाका अध्यक्ष मोनु शाहका अनुसार, विजेता चारै जनाले अन्तर्राष्ट्रिय मञ्चमा नेपालको प्रतिनिधित्व गर्ने अवसर पाएका छन् ।

@parikalanewsofficial

मिस विजेता दिपा क्षेत्री र मिसेस विजेता सारिका बुढाले मलेसियामा हुने अन्तर्राष्ट्रिय प्रतियोगितामा सहभागी हुनेछन्, भने फर्स्ट रनरअपहरू मेरिता पोखरेल र सिर्जना राई मुम्बईमा आयोजना हुने सौन्दर्य प्रतियोगितामा प्रतिस्पर्धा गर्नेछन् । प्रतियोगितामा मिस तर्फ १० जना र मिसेस तर्फ ३ जना सहभागी थिए । सहभागीहरूले प्रारम्भिक चरणमा आत्मविश्वासको अभाव महसुस गरे पनि कार्यक्रमको अन्त्यसम्म आइपुग्दा आफूभित्र ठूलो रूपान्तरण भएको अनुभव सुनाए ।

उनीहरूले अब आफूहरूमा आत्मबल, आत्मविश्वास र सार्वजनिक प्रस्तुतिको क्षमता वृद्धि भएको बताएका छन् । नेपाललाई विश्व मञ्चमा चिनाउने उद्देश्यसहित आयोजना गरिएको यो प्रतियोगिता सहभागी महिलाहरूको व्यक्तित्व विकास र नेतृत्व क्षमताको प्रशिक्षण स्थल समेत बनेको आयोजकको विश्वास छ । विजेताहरूले आगामी दुई महिनाभित्र मलेसिया र मुम्बईको यात्रा तय गर्नेछन् ।