‘द ब्ल्यू लाइट’को शुभमुहूर्त सम्पन्न, यही २२ गतेबाट छायांकन सुरु गरिने

इटहरी/ बलिराम चौहानको डेब्यु निर्देशन रहने साइकोलोजिकल थ्रिलर फिल्म ‘द ब्ल्यू लाइट’को आज काठमाडौंमा शुभमुहूर्त सम्पन्न गरिएको छ । कमलादीस्थित गणेश मन्दिरमा आयोजित समारोहमा फिल्मका कलाकार तथा प्राविधिकहरूको उपस्थिति थियो । निर्माण टिमले दिएको जानकारी अनुसार, फिल्मको छायांकन यही जेठ २२ गते बिहीबारबाट सुरु हुनेछ । काठमाडौं उपत्यकाका विभिन्न रमणीय स्थानहरूमा खिचिने ‘द ब्ल्यू लाइट’ को छायांकन तालिका २० दिनको रहेको छ ।

फिल्मको थिम पोस्टर यसअघि नै सार्वजनिक भइसकेको छ, जसले दर्शकमा कौतुहलता जगाएको छ । निलो रङको रहस्यमय वातावरणमा बालिकाको विछिप्त मुद्राले फिल्मको मनोवैज्ञानिक कथालाई झल्काउँछ । ‘द ब्ल्यू लाइट’मा अर्पण थापा, महेश त्रिपाठी, आयुष्मान देशराज जोशी, बेनिशा हमाल, सृष्टि श्रेष्ठ र सुरक्षा इटानी जस्ता कलाकारहरूको प्रमुख भूमिका रहनेछ ।

बाल कलाकारको रुपमा ग्रिसमा कटुवाल र सहारा शर्माले अभिनय गर्नेछन् । स्काइफल पिक्चर्सको प्रस्तुति रहने यो फिल्मको सह-निर्माता रमन ग्रे हुन् । नरेन्द्र मैनालीले फिल्मको छायांकन गर्नेछन् भने आकाश उखेडा मुख्य सहायक निर्देशकको भूमिकामा छन् ।

@parikalanewsofficial

रेलिजा श्रेष्ठ प्रोडक्सन डिजाइनर र दिलीप पन्त निर्माण नियन्त्रक रहेका छन् । निर्देशक बलिराम चौहानले फिल्मको कथावस्तुलाई अहिले गोप्य राखेका छन् तर प्रचार सामग्री मार्फत जानकारी गराउँदै जाने बताएका छन् । उनले यो जनराकै उत्कृष्ट फिल्म बनाउने लक्ष्य लिएको र दर्शकहरूले मन पराउने विश्वास व्यक्त गरे । ‘बलिदान’ जस्तो बहुप्रतिक्षित फिल्ममा लेखक तथा मुख्य सहायक निर्देशकको अनुभव बटुलेका चौहानले ‘द ब्ल्यू लाइट’ सन् २०२५ भित्रै प्रदर्शनमा ल्याउने योजना रहेको जानकारी दिए ।