केकी, निता, सबिनसंगै ९ जनाले एकैदिन लिए १२ ओटा फिल्मको निर्माण इजाजत

इटहरी/ नेपाली फिल्मको इतिहासमा पहिलोपटक एकैदिनमा १२ वटा फिल्मले निर्माणको लागि आधिकारिक अनुमति लिएका छन् । चलचित्र विकास बोर्डले सोमबार यस्तो ऐतिहासिक रेकर्ड सार्वजनिक गरेको हो, जसले नेपाली फिल्म उद्योगमा फिल्म निर्माणको गतिशीलता र विस्तारको संकेत गर्छ । निर्माण इजाजत लिनेमा निता ढुंगाना, केकी अधिकारी, सविन श्रेष्ठ लगायतका चर्चित अनुहारहरू छन् । कसैले एउटा त कसैले २ ओटा सम्म बोर्डमा फिल्म दर्ता गराएका छन् ।

१) नीता ढुंगानाको दुई फिल्म:
कलाकार तथा निर्मात्री नीता ढुंगानाले आफ्नो ब्यानर निता फिल्म्स प्रोडक्सन प्रा.लि. मार्फत दुई फिल्म ‘एक दुई तीन’ र ‘सुख दुःख’ निर्माण गर्न इजाजत लिएकी छन् । दुबै फिल्ममा उनी स्वयं कलाकारको रूपमा देखिनेछिन् । उनले ‘ह्रस्व दीर्घ २’ बनाउने चर्चाको बीच यी २ फिल्मको इजाजत लिएकी छन् ।

२) गणेशदेव पाण्डेको निर्देशनमा ‘पारी बुटोल’:
निर्देशक गणेशदेव पाण्डेले ‘पारी बुटोल’ नामक फिल्मको निर्माण अनुमति लिएका छन् । फिल्मको कथा, निर्देशन र प्रस्तुति उनले नै गर्ने जनाइएको छ ।

३) सबिन श्रेष्ठको ‘कश्यप’:
अभिनेता सबिन श्रेष्ठले पनि फिल्म निर्माण गर्ने भएका छन् । उनले आफ्नै व्यानर सविन फिल्म्स प्रा.लि. बाट निर्माण गर्नलाई ‘कश्यप’ नामको फिल्मको निर्माण इजाजत लिएका छन् । बुझिए अनुसार यो फिल्मको यही साता निर्माण घोषणा समेत हुँदैछ भने कलाकार छनौट अन्तिम चरणमा पुगेको छ । फिल्ममा प्रमुख अभिनेताको रुपमा सविन आफै रहने र छायांकन कोशी प्रदेशमा हुने जानकारी प्राप्त भएको छ ।

@parikalanewsofficial

४) केकी अधिकारीको दुई फिल्म :
अभिनेत्री तथा निर्मात्री केकी अधिकारीले ‘भद्रकाली’ र ‘राधा पियारी’ शीर्षकमा दुई फिल्म निर्माण गर्न लागेकी छन् । ‘भद्रकाली’लाई उनका भाइ विम्ब अधिकारीले निर्देशन गर्नेछन् भने ‘राधा पियारी’को निर्देशन सञ्जय चौलागाईंले सम्हाल्नेछन् । दुवै फिल्ममा केकी र विम्ब अभिनयमा देखिनेछन् । यो फिल्महरूको पनि सोमबार नै निर्माण इजाजत लिइएको छ ।

५) चेतन आङथुपोको ‘दारासिङ’:
चेतन आङथुपोले लेखन, निर्देशन र निर्माण समेत आफैं सम्हाल्ने गरी ‘दारासिङ’ बनाउने तयारीमा छन् । यस फिल्मले पारिवारिक तथा सामाजिक कथालाई चित्रण गर्ने अनुमान गरिएको छ ।

६) गौरव पहारी र मिस पविको ‘परिवेश’:
अभिनेता गौरव पहारी र मिस पवित्रा साँखी (पवि) को प्रमुख अभिनय रहने गरी ‘परिवेश’ नामक फिल्मले पनि सोमबारै निर्माण इजाजत लिइएको छ ।

७) प्रचण्डमान श्रेष्ठका दुई फिल्म:
यस्तै निर्माता तथा निर्देशक प्रचण्डमान श्रेष्ठले ‘पथलैया’ र ‘जयन्ती’ शीर्षकका दुई फिल्मको निर्माण इजाजत पाएका छन् । ‘जयन्ती’मा अभिनेता अरुण क्षेत्री प्रमुख भूमिकामा रहनेछन् ।

८) वल्र्डवाइड फिल्म्सको ‘स्वर्गीय सिंगे’:
वल्र्डवाइड फिल्म्स प्रा.लिले ‘स्वर्गीय सिंगे’ निर्माणको लागि सोमबार स्वीकृति लिएको छ । फिल्मको कथावस्तु अझै खुलाइएको छैन ।

९) रोशन दासको ‘प्रतिवैरम’:
निर्देशक तथा निर्माता रोशन दासले ‘प्रतिवैरम’ नामक फिल्मको निर्देशन तथा निर्माण दुवै आफैं गर्ने गरी निर्माण इजाजत सोमबार लिएका छन् ।