रेखा थापाको थियटर डेब्यु : ‘मिरा’ आजदेखि रंगमञ्चमा

इटहरी/ नेपाली फिल्म क्षेत्रकी चर्चित अभिनेत्री रेखा थापा अब रंगमञ्चमा डेब्यु गर्न लागेकी छन्। उनी अभिनीत नाटक ‘मिरा’ आज सोमबार बाट कान्तिपुर थियटर, गैरिधारामा मञ्चन हुँदैछ। नाटकको परिकल्पना तथा निर्देशन सुन्दर धितालले गरेका हुन्।

यो नाटकको मञ्चन गत जेठ १५ गते सुरु हुने भनिएको थियो। तर, त्यस दिन काठमाडौंमा सत्तारुढ दल नेकपा एमाले र राजावादी समूहद्वारा आयोजित प्रदर्शनका कारण कार्यक्रम सारिएको थियो।‘मिरा’ नाटकले अब असार ७ गतेसम्म, प्रत्येक बुधबार बाहेक, हरेक दिन साँझ ५ः३० बजे नियमित रूपमा प्रदर्शन हुने आयोजकले जनाएका छन्।

@parikalanewsofficial

नाटकमा रेखा थापासँगै विशाल पहाडी, बिन्दा खतिवडा, विशाल देवकोटा, गीता विष्ट, डोरेश खतिवडा, उन्नत उप्रेती र सुनिल खड्काको पनि सशक्त अभिनय देख्न पाइनेछ।कान्तिपुर थियटरको पहिलो औपचारिक प्रस्तुतिका रूपमा मञ्चन हुन लागेको यो नाटक दीपक सिञ्जालीद्वारा लिखित चर्चित उपन्यास ‘मिरा’ मा आधारित हो। भावनात्मक, सामाजिक र सांस्कृतिक पाटाहरू समेटिएको यो कथा रंगमञ्चमा कसरी जीवन्त रूपमा उत्रन्छ भन्ने उत्सुकता दर्शकमाझ देखिएको छ।