भूपू मायालाई एलिना चौहानको ‘बिहेको निम्तो’, संयोग कि सम्बन्धविच्छेदपछि पिंडा ?

इटहरी/ हालै आफ्नो वैवाहिक जीवन टुंग्याएकी गायिका एलिना चौहानले ‘बिहेको निम्तो’ बोलको नयाँ गीत सार्वजनिक गरेकी छन् । सुरेश अन्जानको प्रस्तुति रहेको यो गीतमा एलिनासँगै सुरेश अन्जानको पनि स्वर सुन्न सकिन्छ । गीतको शब्द तथा संगीत दुवै सुरेश अन्जानले नै तयार पारेका हुन् भने बिमल छिनालले संगीत संयोजन गरेका छन् । विष्णु सापकोटासँग लामो समयको प्रेम पश्चात विवाह बन्धनमा बाँधिएको केहि समयमै एलिना चौहानले सापकोटासंग वैवाहिक सम्बन्ध तोडेकी थिइन् । सम्बन्ध विच्छेद पश्चात एलिनाको यस्ता खाले गीतमा स्वर अलि धेरै नै सुन्न थालिएको छ ।

अब यो संयोग हो वा सम्बन्धविच्छेदको पिडालाई गीत मार्फत व्यक्त गर्न खोजेकी हुन्, त्यो त उनि नै जान्दछिन् । एलिनाको यो नयाँ प्रस्तुतिलाई उनका फ्यानले कसरी लिन्छन्, त्यो भने समयले नै बताउनेछ । हालै सार्वजनिक गीत ‘बिहेको निम्तो’ डाइनामिक स्टुडियोमा रेकर्ड गरिएको हो भने मिलन विश्वकर्मा, अशिम चाँद विश्वकर्मा, रुपी सिञ्जाली मगर र ज्ञानु परियारको कोरस भोकल रहेको छ । सुरेश अन्जान अफिसियल युट्युब च्यानलबाट सार्वजनिक गरिएको भिडियोको निर्माता सुरेश अन्जान नै हुन् । हेर्नुस भिडियो ।

‘बिहेको निम्तो’को भिडियोमा चर्चित कलाकारहरु नाजिर हुसेन, प्रियंका कार्की र सञ्जय देवकोटाको अभिनय देख्न सकिन्छ । कार्की र हुसैनको ठुम्का हेर्न लायक छ । भिडियोमा कलाकारलाई विमल तामाङले मेकअप गरेका छन् भने नवराज उप्रेती र उनको टोलीले छायांकन गरेका हुन् । मिलन विश्वकर्माले नै भिडियोको सम्पादन, कलर र भिएफएक्सको काम गरेका छन् । मुना तामाङले नृत्य निर्देशन गरेको भिडियोमा अमर रावल ‘कोसिस’को सहायक निर्देशन तथा निर्माण व्यवस्थापन रहेको छ । जेरी भण्डारीले यस गीतको कथा, निर्देशन र नृत्य कोरियोग्राफी गरेका हुन् ।

@parikalanewsofficial