‘जन्ते बाख्रो’को प्रचारमा नयाँ शैली

इटहरी /‘जन्ते बाख्रो’ फिल्मले आफ्नो प्रचार अभियानलाई फरक ढंगले प्रस्तुत गर्दै शनिबार साँझ एक विशेष साङ्गीतिक कार्यक्रमको आयोजना गर्‍यो। सिटी स्क्वायर मल, सामाखुसीमा सम्पन्न उक्त कार्यक्रममा फिल्मका गीतहरू गायक गायिकाहरूको प्रत्यक्ष प्रस्तुतिमा दर्शक झुमेका थिए। गीतहरूमा ‘घामै राजा’, ‘अङ्गुरको झुप्पो’, ‘मुकु मुकु म्या’ जस्ता शीर्षक रहेका थिए, जसमा बाबुल गिरी, महेश काफ्ले, अस्मिता अधिकारी जस्ता आवाजहरूले रंग थपेका थिए।

कार्यक्रमको दृश्यात्मक पक्षलाई रोचक बनाउन अभिनेत्री गरिमा शर्मालाई दुलहीको लुगामा सजाएर बग्गीमा राखिएको थियो। बग्गीसँगै ‘जन्ते बाख्रो’ लेखिएको टिसर्ट र बोकाको टाउको झल्कने कटआउट बोकेका युवाहरूको टोलिले दर्शकहरूको ध्यान खिच्यो।

फिल्मका मुख्य कलाकारहरू जस्तै आसिफ शाह, विशाल पहारी, कमल देवकोटा, लोकेन्द्र लेखक, र समापिका गौतम, साथै निर्देशक सिमोर सुनुवार, लेखक प्रदीप भारद्वाज, र निर्माता सन्तोष गौतम पनि कार्यक्रममा सहभागी थिए।निर्देशक सुनुवारका अनुसार, गाउँघरमा पहिले प्रचलित जन्तीको परम्परा जहाँ भुइँमा पङ्क्तिबद्ध भइ दुनामा खाना खान्थे जस्ता मौलिक दृश्यहरू फिल्ममा समेटिएका छन्। उनले भने, “हाम्रो संस्कृति बिर्सिंदै गइरहेका बेला, यस फिल्मले ती भुलिँदै गरेका परम्परालाई पुनः सम्झाउने प्रयास गरेको छ”। यसअघि विभिन्न सहरहरूमा टेम्पोहरूमा पोस्टर टाँसी फिल्मको प्रचार गरिएकोमा, अहिले साङ्गीतिक कार्यक्रममार्फत दर्शकसँग प्रत्यक्ष सम्पर्कमा जान खोजिएको निर्देशक सुनुवारले बताएका छन् ।

मुईन इन्टरटेनमेन्टको ब्यानरमा बनेको यो फिल्ममा छायांकन माहरि हुमागाईंले गरेका छन् भने सम्पादन सुनिल शिवभक्तिको रहेको छ। निर्माणतर्फ सन्तोष गौतमले नेतृत्व दिएका छन्। फिल्म यही जेठ २३ गतेबाट देशभर प्रदर्शनमा आउँदैछ।