विशेष कारण पोष्टपोण्ड गरिएको फिल्म ‘महाभोज’ अब जेठ ३० मा प्रदर्शन हुने

इटहरी/ बहुप्रतिक्षित नेपाली फिल्म ‘महाभोज’ अब जेठ ३० गते देशभर प्रदर्शनमा आउने भएको छ । निर्धारित मिति जेठ १५ मा रिलिज हुन नसकेको फिल्म अब नयाँ मितिमा दर्शकमाझ आउन लागेको हो । क्लक वर्क क्रियसन र पिक्चर फ्रेमको प्रस्तुति तथा हिमाल कडरियाको निर्माणमा तयार भएको यो फिल्म विशेष परिस्थितिका कारण तोकिएको मितिमा रिलिज हुन सकेको थिएन ।

निर्देशक दिनेश राउतले नयाँ मिति घोषणा गर्दै दर्शकहरूसँग क्षमा मागेका छन् । उनले भने, “हामीले धेरै मिहिनेतका साथ तयार पारेको फिल्म ‘महाभोज’ केही विशेष परिस्थितिका कारण निर्धारित मितिमा रिलिज गर्न सकेनौँ । दर्शकहरूप्रति यसबाट असहजता सिर्जना भएकोमा हामी क्षमा प्रार्थी छौँ ।”

राउतले दर्शकको धैर्य र मायाका लागि आभार व्यक्त गर्दै फिल्म हेर्न हलमा उपस्थित हुन आग्रह पनि गरेका छन् । “यो हाम्रो समाजको कथा हो, तपाईंहरूको साथ र मायाले मात्र हामी सफल हुन्छौँ,” उनले भने । केही दिनअघि काठमाडौंमा आयोजित प्रिभ्यु शोमा फिल्मको कथा, प्रस्तुति र अभिनयले प्रशंसा पाएको थियो ।

@parikalanewsofficial

सहकारी पीडितको संवेदनशील विषय उठान गर्दै मनोरञ्जक शैलीमा प्रस्तुत गरिएको फिल्मलाई दर्शकहरूले सकारात्मक प्रतिक्रिया दिएका थिए । ‘महाभोज’ मा दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, गौमाया गुरुङ, वसुन्धरा भुसाल र मोहन निरौलाको अभिनयले फिल्मलाई विशेष बनाएको छ ।