हलिउडमा नेपाली झण्डा: ‘पाउलो’ लस एन्जलसको फिल्म फेस्टिभलमा छनोट

इटहरी/अमेरिकाको प्रतिष्ठित अथेन्टिक ग्लोबल फिल्म फेस्टिभल मा नेपाली सर्टफिल्म ‘पाउलो’ छनोट भएको छ, जुन नेपालका लागि एउटा ठूलो अन्तर्राष्ट्रिय सफलता हो। लस एन्जलसको बेभर्ली हिल्सस्थित फाइन आर्ट थिएटरमा यही जुन १२ र १३ मा प्रदर्शन हुने यो फिल्मले विश्वभरका करिब ३,५०० प्रतिस्पर्धी फिल्महरूलाई पछि पार्दै ३८ उत्कृष्ट फिल्मको सूचीमा आफ्नो स्थान बनाएको छ।

जाम्बियाली निर्देशक तथा राजकुमार गेर्शोम सिकाला ले स्थापना गरेको यो फेस्टिभल हलिउड फिल्म उद्योगमा विशेष महत्व राख्छ। ‘पाउलो’ को यो अन्तर्राष्ट्रिय मञ्चमा उपस्थिति पहिलो पटक भने होइन। यसअघि पनि यसले विभिन्न देशका प्रतिष्ठित महोत्सवहरूमा सहभागिता जनाइसकेको छ। भारतको इन्टरनेशनल सिने अवार्डमा यसले उत्कृष्ट सर्टफिल्म, मौलिक कथा र निर्देशकको रूपमा विशेष सम्मान पाउनुका साथै चीन, रूस, बेलायत, जिम्बाब्वे र भारतका अन्य फेस्टिभलहरूमा समेत नेपाली सिनेमाको प्रतिनिधित्व गरिसकेको छ।

काठमाडौंको पशुपति क्षेत्र वरिपरि छायांकन गरिएको ‘पाउलो’ एउटा सडक बालकको मार्मिक कथामा आधारित छ। तर, यसको मौलिक पक्ष भनेको कथा बालकले नभई, उसको साथमा हुने एक जोडी जुत्ताले बोल्नु हो! यो जुत्ता कहिले खुसी, कहिले पीडा र जीवनका अनेकौँ उतारचढावहरूको साक्षी बनेर कथालाई अगाडि बढाउँछ। सामान्य फिल्महरूले पात्रहरूलाई केन्द्रमा राख्ने गर्छन् भने, ‘पाउलो’ ले एउटा निर्जीव वस्तुलाई नै कथाको प्राण बनाएर जीवनका गहिरा अनुभूतिहरूलाई प्रतीकात्मक रूपमा प्रस्तुत गरेको छ। यसैले ‘पाउलो’ केवल एक फिल्म नभई, एक भावनात्मक यात्रा हो।

फिल्मको लेखन र निर्देशन मोहन अभिलाषी ले गरेका हुन्, जो ‘घुर्रा’, ‘भाउ’, ‘द स्कूल वाल’ जस्ता सफल फिल्महरूमार्फत राष्ट्रिय तथा अन्तर्राष्ट्रिय दुवै क्षेत्रमा परिचित छन्। यस फिल्ममा प्रशान्त हुमागाईं, सुवास सिलवाल, मोहन श्रेष्ठ लगायतका कलाकारहरूको जीवन्त अभिनय रहेको छ।‘पाउलो’ को निर्माणमा रेनुका कार्कीले कास्टिङ निर्देशनको जिम्मेवारी सम्हालेकी छन् भने छायांकन नारायण जिसीले गरेका हुन्। सम्पादनको काम अनिल महर्जनले गरेका छन्। सुरेन्द्र क्षेत्रीले आर्ट डिरेक्शन, चक्र पोख्रेलले प्रोडक्सन म्यानेजमेन्ट र करन साउदले सह-निर्देशनको भूमिका निर्वाह गरेका छन्।नेपाली बजारमा गुणस्तरीय जुत्ता तथा चप्पल उत्पादनमा ख्यातिप्राप्त ब्ल्याक हर्स जुत्ता कम्पनीले ‘पाउलो’ लाई प्रायोजन गरेको छ। यसले नेपाली कलालाई अन्तर्राष्ट्रिय स्तरमा पुर्‍याउन महत्त्वपूर्ण योगदान पुर्‍याएको छ। यस्तो उपलब्धिले नेपाली फिल्म उद्योगलाई विश्वव्यापी चिनारी दिलाउने दिशामा थप मद्दत गर्ने अपेक्षा गरिएको छ।