भोलिदेखि प्रदर्शन हुने फिल्म ‘माहाभोज’ देशको अस्थिरताले प्रदर्शन रोकियो

काठमाडौं/ दर्शकहरूले उत्सुकतापूर्वक पर्खिरहेको फिल्म ‘महाभोज’को प्रदर्शन निर्धारित मितिमा नहुने भएको छ । भोलि अर्थात् जेठ १५ गतेदेखि रिलिज हुने तय भएको यो फिल्म देशमा भइरहेका विभिन्न आन्दोलन र असहज परिस्थितिका कारण तत्कालका लागि रोकिएको हो । निर्माता हिमाल कडरियाले बुधबार जारी गरेको प्रेस विज्ञप्तिमा प्रदर्शन स्थगित गरिएको जानकारी गराएका हुन् ।

निर्माता कडरियाले दर्शकहरूको सुरक्षालाई ध्यानमा राख्दै यो निर्णय लिएको बताएका छन् । विज्ञप्तिमा भनिएको छ, “हाल देशव्यापी रूपमा देखिएको अशान्ति र असहज परिस्थितिले जनजीवन प्रभावित भएकोले, हामीले ‘महाभोज’ को प्रदर्शन नेपाल र विदेशमा समेत स्थगित गरेका छौं ।”

‘महाभोज’ सहकारी ठगीको विषयमा बनेको फिल्म हो, जसलाई लिएर दर्शकहरूमा ठूलो अपेक्षा थियो । यद्यपि, अहिलेको परिस्थितिलाई मध्यनजर गर्दै प्रदर्शनको नयाँ मिति अवस्था सामान्य भएपछि मात्र घोषणा गरिने निर्माताले जानकारी दिएका छन् । निर्माताले दर्शकहरूको धैर्यता र फिल्म युनिटलाई दिइने साथका लागि धन्यवाद ज्ञापन गरेका छन् । चाडै नै फिल्मको नयाँ प्रदर्शन मिति सार्वजनिक गरिने बताइएको छ ।

@parikalanewsofficial