क्यारेक्टरमा डुबेका सुमनको प्रश्न: अहिलेका स्टार ‘कलाकार कि गाडीलाइनका मान्छे ?’

इटहरी/ पछिल्लो समय चर्चामा रहेको टेलिभिजन कमेडी रियालिटी शो ‘कमेडी नाइट विथ च्याम्पियन’को पछिल्लो श्रृंखलामा हाँस्य कलाकार सुमन कार्कीले नेपाली फिल्मका स्टार कलाकारहरूलाई लिएर रोचक तथा यथार्थ टिप्पणी गरेका छन् । कार्यक्रममा अभिनेता दीलिप रायमाझी लगायतका कलाकारहरू अतिथिको रूपमा उपस्थित थिए ।

आफ्नो प्रस्तुतिको क्रममा सुमनले विगतका र वर्तमानका स्टार कलाकारहरूबीचको भिन्नता र उनीहरूको कार्य शैलीलाई औंल्याए । उनले भने, “स्टार भनेको परबाट देखिने, सजिलै भेट्न नसकिने व्यक्ति हो नि । पहिला राजेश हमाल, दीलिप रायमाझी, विराज भट्ट, निखिल उप्रेती जस्ता कलाकारहरूलाई भेट्न आकाशको तारा जस्तै थियो ।”

त्यसैगरी, उनले अहिलेका कलाकारहरूको सजिलो उपलब्धता र फिल्म प्रमोशनको शैलीलाई व्यङ्ग्य गर्दै भने, “अहिलेका स्टारहरू त फिल्म रिलिज नहुँदै ‘कस्तो लाग्यो ?’ भन्दै हलमा आइपुग्छन् । भोलि धनगढी, पर्सि झापा, चतरा, इटहरी, विर्तामोड ! होइन यिनीहरू कलाकार हुन् कि गाडीलाइनका मान्छे हुन् ?”

@parikalanewsofficial

सुमन कार्कीको यो कमेडीले दर्शकहरूलाई खूब हँसाएको छ । तर, यथार्थ चित्रण उनको प्रस्तुतीमा झल्किएको छ । विगतका स्टारहरूको दुर्लभ उपस्थिति र अहिलेका स्टार कलाकारहरूको सहज पहुँचले दर्शकलाई कस्तो अनुभव गराउँछ भन्ने विषयमा यो टिप्पणीले बहस सिर्जना गर्न सक्ने देखिन्छ । कार्कीको यो प्रस्तुतिले कमेडीको माध्यमबाट नेपाली फिल्म उद्योगको वर्तमान अवस्थालाई उजागर गरेको बुझ्न सकिन्छ ।