‘म्यान अफ द वर्ल्ड २०२४’मा नेपालको प्रतिनिधित्व गर्दै आयुष फिलिपिन्स प्रस्थान

इटहरी/ म्यान अफ द वर्ल्ड नेपाल २०२५ को उपाधि विजेता आयुष दुलालले अन्तर्राष्ट्रिय म्यान अफ द वर्ल्ड २०२४ प्रतियोगितामा नेपालको प्रतिनिधित्व गरेका छन् । मे २३ देखि ३१ सम्म फिलिपिन्समा आयोजित यो प्रतिष्ठित सौन्दर्य प्रतियोगितामा सहभागी हुन दुलाल बिहीबार राति फिलिपिन्स प्रस्थान गरेका हुन् ।

त्रिभुवन अन्तर्राष्ट्रिय विमानस्थलमा दुलाललाई बिदाई गर्न मिस्टर नेपाल २०२३ का विजेता समर्पण कार्की, मिस्टर वर्ल्ड २०२५ का सन्तोष लोक्सम, मिस्टर ग्लोबल २०२५ का योगेश श्रेष्ठ, मिस्टर नेपालका क्षेत्रीय निर्देशक सन्दीप केसी, राष्ट्रिय निर्देशक रवि धमला र नेक्स्ट मोडल्स नेपालकी प्रबन्ध निर्देशक यतना पाण्डे लगायत व्यक्तित्वहरुको उपस्थिति थियो ।

दुलालले मिस्टर नेपाल २०२५ मा ‘म्यान अफ द वर्ल्ड नेपाल २०२५’ को ताज पहिरिएसँगै यो अन्तर्राष्ट्रिय अवसर प्राप्त गरेका हुन् । सोही प्रतियोगितामा उनले ‘बेस्ट पर्सनालिटी’ को अवार्ड समेत हात पारेका थिए । यस वर्षको म्यान अफ द वर्ल्ड प्रतियोगितामा ३४ भन्दा बढी देशका प्रतिस्पर्धीहरु सहभागी हुँदैछन् र दुलाल नेपालको एक्लो प्रतिनिधित्व गर्नेछन् ।

@parikalanewsofficial

नेपालको कला र संस्कृतिलाई विश्वसामु चिनाउने उद्देश्यले दुलालले प्रतियोगिताको राष्ट्रिय पोशाक राउण्डका लागि विशेष नेवारी सांस्कृतिक पहिरन तयार पारेका छन् । यसका साथै उनले प्रतियोगितामा सहभागी हुने सम्पूर्ण राष्ट्रका प्रतिनिधिहरुलाई नेपालको पहिचान झल्किने खुकुरी उपहार स्वरुप प्रदान गर्ने योजना लिएर गएका छन् ।

प्रस्थानअघि सञ्चारकर्मीहरुसँग कुरा गर्दै दुलालले भने, “यो प्रतिस्पर्धा मेरा लागि विभिन्न देशका दाजुभाइहरुसँग सम्बन्ध स्थापित गर्ने माध्यम बन्नेछ । मैले नेपालका अनुपम हिमशृङ्खला र गौतम बुद्धको जन्मस्थल लगायतका पर्यटकीय स्थलहरुको बारेमा जानकारी गराउँदै उहाँहरुलाई नेपाल भ्रमणको लागि प्रेरित गर्नेछु।” उनले यो अन्तर्राष्ट्रिय मञ्चलाई नेपालको संस्कृति र पर्यटन प्रवर्द्धनमा सक्दो प्रयोग गर्ने आफ्नो प्रतिबद्धता व्यक्त गरे ।