‘महाराजधिराज’मा अभिनेता पुष्प खड्काको इन्ट्री

इटहरी/ लामो समयपछि अभिनेता पुष्प खड्का नेपाली फिल्ममा कमब्याक गर्न भएका छन् । उनी ‘महाराजधिराज’ नामक नयाँ फिल्ममा अनुबन्धित भएका हुन् । फिल्म निर्माण युनिटले आइतबार पुष्पसँग सम्झौता गरेको छ । फिल्ममा यसअघि नै आर्यन सिक्देल, रमेश उप्रेती र पल शाह जस्ता चर्चित कलाकार अनुबन्धित भइसकेका छन् । नायिकाको भूमिकामा वर्षा राउत र वर्षा शिवाकोटी देखिनेछिन् ।

फिल्ममा पुराना र नयाँ पुस्ताका कलाकारको संयोजन देख्न पाइने भएकाले यसको कथावस्तु फरक हुने अनुमान गरिएको छ । अभिनेता पुष्प खड्काले ‘महाराजधिराज’ मा आफ्नो भूमिका विशेष र महत्वपूर्ण रहेको बताएका छन् । उनी यो फिल्मबाट आफूले नयाँ उचाइ प्राप्त गर्नेमा विश्वस्त छन् । ‘महाराजधिराज’को निर्देशन परिच्छेद सेनले गर्नेछन् । यसअघि सेनले निर्देशन गरेको फिल्म ‘प्रेमगञ्ज’ ले राम्रो प्रतिक्रिया पाएको थियो ।

फिल्मको कथा पनि निर्देशक सेनकै हो । छत्रेश्वर म्यानेजमेन्ट प्रालिको निर्माण रहने यो फिल्मका प्रस्तुतकर्ता विराज बिष्ट हुन्, जसले यसअघि राष्ट्रिय अवार्ड विजेता फिल्म ‘बुलाकी’ निर्माण गरेका थिए । टोपेन्द्र विष्ट, चक्रबहादुर केसी र रवि खड्का फिल्मका निर्माता हुन् । ‘महाराजधिराज’ आगामी फूलपातीमा देशभर प्रदर्शनमा आउने तयारीमा छ । त्यसैले पनि यो फिल्मको चर्चा फिल्मी बजारमा व्यापक छ । यो सँगै आधा दर्जन फिल्म सो मितिमा रिलिज हुने पक्कापक्की छ । यो फिल्मको पोस्टर यसअघि नै सार्वजनिक भइसकेको छ ।

@parikalanewsofficial