‘बलिदान’का मुख्य सहायक निर्देशक बलिरामले घोषणा गरे फिल्म ‘द ब्ल्यू लाइट’

इटहरी/ बहुप्रतिक्षित फिल्म ‘बलिदान’का लेखक तथा मुख्य सहायक निर्देशक बलिराम चौहानले ‘द ब्ल्यू लाइट’ फिल्म मार्फत निर्देशनमा डेब्यु गर्ने भएका छन् । मंगलबार फिल्मको टाईटल तथा थीम पोष्टर सार्वजनीक गर्दै निर्माण घोषणा गरिएको हो । स्काइफल पिक्चर्सको प्रस्तुति रहने यस फिल्ममा रमन ग्रे सहायक निर्माताको भूमिकामा छन् भने नरेन्द्र मैनालीले छायांकनको जिम्मा लिएका छन् ।

यो फिल्मलाई निर्देशक चौहानले सन् २०२५ भित्रै रिलिज गर्ने लक्ष्य लिएका छन् । सार्वजनिक गरिएको थिम पोस्टरले दर्शकमाझ कौतुहलता जगाएको छ । नामअनुसार नै निलो रङको बाहुल्यता रहेको पोस्टरमा एक बालिकाको कम्मरभन्दा माथिको पछिल्लो भाग देखाइएको छ । उनको जुङरुङ्ग कपाल छ र पृष्ठभूमिमा निलो रङको बादलजस्तो आकृति देखिन्छ ।

पोस्टरमा रहेकी बालिकाको हाउभाउले उनी विछिप्त अवस्थामा रहेको सामान्य अनुमान गर्न सकिए पनि, यसको प्रष्ट अर्थ भने खुलेको छैन । निर्देशक चौहानले थिम पोस्टरले दिन खोजेको सन्देश वा फिल्मको कथावस्तुबारे अहिले नै केही खुलाउन चाहेका छैनन् । यसैगरी, कलाकारहरूको बारेमा पनि कुनै जानकारी सार्वजनिक गरिएको छैन ।

@parikalanewsofficial

निर्देशक चौहानले फिल्मबारे थप जानकारी विस्तारै सार्वजनिक गर्दै जाने बताएका छन् । उनले भने, “हामी विस्तारै फिल्मबारे थप जानकारी दिँदै जानेछौँ । कलाकारका लागि पनि केहीसँग कुरा भइरहेको छ, फाइनल भएपछि जानकारी दिन आउने छौँ ।” उनले थप स्पष्ट पार्दै भने, “अहिले बजारमा नाम चलेका प्रमुख कलाकारहरू नै हाम्रो फिल्ममा हुनुहुनेछ ।” यसर्थ ‘द ब्ल्यू लाइट’ मा स्थापित र लोकप्रिय कलाकारहरूको सहभागिता रहने निश्चित भएको छ ।