फिल्म ‘ऊनको स्वीटर’ले विश्वका विभिन्न देशहरूमा पनि तहल्का मच्चाउँदै

इटहरी/ नेपाली फिल्म ‘ऊनको स्वीटर’ले नेपालमा मात्र होइन अहिले विश्वका विभिन्न देशहरूमा पनि तहल्का मच्चाइरहेको छ । देशभित्र बक्स अफिसमा ऐतिहासिक सफलता हासिल गरेपछि, यो फिल्मले अहिले अन्तर्राष्ट्रिय बजारमा पनि अभूतपूर्व दर्शकको माया पाइरहेको छ, जसले नेपाली यो फिल्मको पहुँचलाई नयाँ उचाइमा पुर्‍याएको छ । लेखक तथा निर्देशक नवीन चौहानको निर्माणमा बनेको यो फिल्म अहिले संयुक्त राज्य अमेरिकाका ३० भन्दा बढी सहरहरूमा एकसाथ प्रदर्शन भइरहेको छ ।

न्युयोर्कदेखि क्यालिफोर्निया, टेक्सासदेखि वासिङ्टन, ओहायोदेखि फ्लोरिडा सम्मका विभिन्न राज्यहरू – जस्तै म्यासाचुसेट्स, न्यु ह्याम्पशायर, कनेटीकट (पूर्वोत्तर), पेनसिल्भेनिया, मेरिल्यान्ड, भर्जिनिया, वासिङ्टन डि.सी. (मीड-अटलान्टिक), ओहायो, इलिनोइस, आइओवा, विस्कन्सिन, मिसौरी, नर्थ डकोटा, केन्टकी (मिडवेस्ट), जर्जिया, फ्लोरिडा, टेनेसी (साउथईस्ट), टेक्सास (साउथ सेन्ट्रल), कोलोराडो (माउन्टेन वेस्ट), वासिङ्टन र क्यालिफोर्निया (पश्चिमी तट) – मा रहेका नेपाली समुदायले यसलाई उत्साहजनक रूपमा हेरिरहेका छन् ।

अमेरिका भरिका नेपाली समुदायमा फिल्मप्रतिको उत्साह टिकटका अग्रिम बुकिङ र हलहरूको भरिभराउ अवस्थाबाट स्पष्ट देखिन्छ । त्यस्तै, अष्ट्रेलियाका सिड्नी, मेलबर्न, ब्रिसबेन जस्ता प्रमुख सहरहरूमा पनि प्रदर्शनको पहिलो दिनदेखि नै फिल्मले हाउसफुल शोहरू दिँदै आएको छ । जापानका योकोहामा, टोकियो, ओसाका, क्युसु, फुकुओका, कुमामोटो, कुरुमे, कोबे, गिफु, नागोया, चिबा, नरिता र ओकिनावा लगायतका प्रमुख सहरहरू तथा दक्षिण कोरियाका सियोल, किम्हे, सुवोन, मोक्तो, किम्पो, फुयो, जिन्छान, ओन्याङ ओन्छान र फाजु जस्ता शहरहरूमा पनि ‘ऊनको स्वीटर’ प्रति दर्शकको आकर्षण चुलिएको छ ।

@parikalanewsofficial

यी देशहरूमा रहेका नेपाली समुदाय, खासगरी विद्यार्थी र कामदार वर्गले फिल्मलाई विशेष साथ दिएका छन् । युरोपका डेनमार्क, पोर्चुगल, बेल्जियम, साइप्रस, माल्टा जस्ता देशहरूमा पनि मे १८ देखि प्रदर्शन सुरु हुने तयारीमा छ भने क्यानडा, हङकङ, सिङ्गापुर र युनाइटेड किङडममा पनि शोहरू तय गरिँदैछन् । मध्यपूर्वका संयुक्त अरब इमिरेट्स, कतार, बहराइन, ओमन लगायतका देशहरूमा पनि फिल्मले राम्रो व्यापार गरिरहेको छ ।

नेपालमा भने यो फिल्म रिलिजको पहिलो सातामै ५ करोड ७५ लाख रुपैयाँ ग्रस कलेक्सन गरेर वर्षकै पहिलो ‘हिट’ फिल्म बन्न सफल भइसकेको छ । नेपाली फिल्मको इतिहासमा यसलाई आर्थिक र दर्शकीय दुवै हिसाबले उल्लेखनीय मानिएको छ ।
फिल्ममा विपिन कार्की, मिरुना मगर, परीक्षा लिम्बु, एलेक्स पारस, विल्सन विक्रम राई, सुरज तमु, भावना खपाङ्गी मगर, सुनिल पोखरेल लगायतका कलाकारहरूको जीवन्त अभिनय रहेको छ । फिल्मको यथार्थपरक कथावस्तु, मार्मिक संवाद र नवीन चौहानको सुन्दर निर्देशनले सबै वर्गका दर्शकको मन जित्न सफल भएको छ ।

फिल्मका गीतहरू, विशेषगरी ‘चाइनेजो जिन्दगानीमा’ युट्युब र टिकटकमा अत्यधिक लोकप्रिय बनेको छ । अन्य गीतहरू ‘फूल’, ‘मखमली’ र ‘काफ्ले’ ले पनि करोडौं भ्यूज पाइसकेका छन् । यसले पनि फिल्मको चर्चा बढाउन मद्दत गरेको छ । फिल्मको ट्रेलर युट्युबमा ट्रेन्डिङको पहिलो स्थानमा पुगेको थियो । दर्शकको उत्साहलाई मध्यनजर गर्दै फिल्म निर्माण टोलीले दोस्रो हप्तामा पनि करिब २०० शो प्रदर्शन जारी राखेको छ ।

साथै, फिल्मको प्रचारप्रसारका लागि अभिनेता विपिन कार्की, अभिनेत्री परीक्षा लिम्बु, एलेक्स पारस र गायक सुजन चापागाईँ सहितको टोलीले शुक्रवारदेखि देशव्यापी कलाकार परिचय तथा प्रचार भ्रमण सुरु गरेको छ । दमौली र पोखराबाट सुरु भएको यो भ्रमण चितवन, बुटवल, दाङ, नेपालगन्ज, धनगढी, दमक, धरान, विराटनगर र इटहरीसम्म पुग्नेछ । समग्रमा, ‘ऊनको स्वीटर’ ले नेपाली फिल्मलाई देशभित्र मात्र नभई अन्तर्राष्ट्रिय स्तरमा समेत सफल बनाउन महत्वपूर्ण भूमिका खेलेको छ, जसले आगामी दिनमा नेपाली फिल्मको विश्वव्यापी पहुँचका लागि नयाँ ढोका खोलिदिएको छ ।