सहकारी सङ्कटको यथार्थ बोकेको ‘महाभोज’: ट्रेलर रिलिजअघि आयो पोष्टर

काठमाडौँ/ नेपाली समाजले यतिबेला भोगिरहेको जटिल यथार्थमध्ये एक हो, सहकारी क्षेत्रमा देखिएको सङ्कट र त्यसबाट प्रभावित लाखौँ नागरिकको पीडा । यही संवेदनशील विषयवस्तुलाई पर्दामा कलात्मक ढङ्गले उतार्ने तयारीमा रहेको बहुप्रतिक्षित नेपाली फिल्म ‘महाभोज’ हाल चर्चामा छ । ‘सत्य कहिल्यै लुक्दैन’ भन्ने सशक्त नाराका साथ घोषणा भएको यो फिल्म यही जेठ १५ गते प्रदर्शनमा आउने तयारीमा छ ।

प्रचारप्रसारको क्रममा फिल्मको ट्रेलर सार्वजनिक हुनु अघि निर्माण पक्षले यसको नयाँ अफिसियल पोष्टर रिलिज गरेको छ । ट्राइडेन्ट कन्सेप्टका रोयल भीमसेनले डिजाइन गरेको यो पोष्टरले फिल्मको मूल भाव र नेपाली समाजको सामाजिक सङ्घर्षलाई प्रतीकात्मक रूपमा दर्शाएको छ । पोष्टरमा ‘महाभोज’का मुख्य तीन पात्रहरू अभिनेता दयाहाङ राई, आर्यन सिग्देल र खगेन्द्र लामिछानेलाई प्रमुखताका साथ प्रस्तुत गरिएको छ ।

दयाहाङ दौरा-सुरुवाल, ढाका टोपी र मालामा एक गम्भीर तथा जिम्मेवार व्यक्तिको भूमिकामा देखिन्छन् । उता, खगेन्द्रको अनुहारमा केही असन्तुष्टि वा चिन्ताको भाव झल्कन्छ भने आर्यनमा अनिश्चय, डर वा असहजताको भावना देख्न सकिन्छ । यी तीनै पात्रहरूको मुहारको भावले फिल्ममा आउने द्वन्द्व, द्वैधता र गहिरो कथावस्तुको सङ्केत दिन्छ । सशक्त सामाजिक कथावस्तुलाई जीवन्त रूपमा प्रस्तुत गर्न माहिर मानिने निर्देशक दिनेश राउतको यो आठौँ निर्देशकीय प्रस्तुति हो ।

@parikalanewsofficial

क्लक वर्क क्रियशन र पिक्चर फ्रेमको संयुक्त प्रस्तुतिमा निर्माण भएको यो फिल्मका निर्माता हिमाल कडरिया हुन् । फिल्मको कथा तथा पटकथा सुवेदीले तयार पारेका छन् । फिल्ममा दयाहाङ राई, आर्यन सिग्देल, खगेन्द्र लामिछानेका साथै अञ्जना बराइली, गौमाया गुरुङ, मलिका महत, वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, र वीरेन्द्र सिंह कुशवाहजस्ता कलाकारहरूको बाक्लो उपस्थिति रहेको छ ।