गजल ‘नदीमा तिमी छौ’: बबिना भट्टराईको स्वर, संगीत र भिडियोमा आफै फिचर्ड

काठमाडौं/ पछिल्लो समय नेपाली साहित्य र संगीतको क्षेत्रमा गजलले पुनरागमन गर्दै आफ्नो छुट्टै स्थान बनाइरहेको छ । परम्परागत साहित्यिक सुगन्धलाई कायम राख्दै समसामयिक विषयवस्तुलाई कलात्मक ढंगले पस्कने माध्यमका रूपमा गजलको प्रभाव चुलिँदो छ । यही क्रममा, प्रेमको गहिरो भाव बोकेको नयाँ गजल ‘नदीमा तिमी छौ’ सार्वजनिक भएको छ, जसले गजल पारखीहरूमाझ नयाँ उत्साह थपेको छ । वरिष्ठ गजलकार डा. भोजराज घिमिरेको प्रेरणाबाट गजल लेखनमा लागेका र झण्डै एक हजार गजल लेखिसकेका गजलकार बिनोद खनालको रचना रहेको यस गजललाई चर्चित गायिका तथा संगीतकार बबिना भट्टराईले आफ्नो मधुर स्वर र सङ्गीतले सजाएकी छिन् ।

१६ वर्षभन्दा लामो संगीत यात्रामा सुगम संगीतदेखि भक्ति संगीतसम्ममा आफूलाई स्थापित गरिसकेकी बबिनाको स्वरमा यो गजल जीवन्त बनेको छ । ‘नदीमा तिमी छौ, लहरमा तिमी छौ’ जस्ता पंक्तिहरूबाट सुरु हुने यो गजलले प्रेमको गहिरो र प्रतीकात्मक व्याख्या प्रस्तुत गरेको छ । यहाँ ‘नदी’ लाई जीवनयात्राको प्रतीकका रूपमा लिइएको छ, जुन निरन्तर बगिरहन्छ र परिवर्तनशील हुन्छ । नदीको लहरमा प्रेमीको उपस्थिति दर्शाइएको छ, जसले जीवनको हरेक उतारचढाव र चलायमानतामा प्रेमिकाको साथ रहेको अनुभूति गराउँछ ।

गजलले डुङ्गालाई प्रेमीको अस्तित्वसँग तुलना गर्दै प्रेमिकाविना डुङ्गाको कुनै अर्थ नभएको दर्शाएको छ । यसरी प्रेमिका जीवनको मूल प्रवाह र दिशानिर्देश गर्ने तत्व बनेकी छिन् । ‘तिमी साँझ मेरो तिमी नै बिहानी’ भन्दै प्रेमिकालाई आशाको किरण र जीवनको सुरुवात र अन्त्य दुवैको रूपमा चित्रण गरिएको छ । ‘बनि दृष्य सुन्दर नयन सामु आयौ, भएँ मन्त्रमुग्ध नजरमा तिमी छौ’ शेरले प्रेमलाई केवल शारीरिक आकर्षणभन्दा माथि उठाएर एक गहन अनुभूति र आत्मिक समाहितिको रूपमा प्रस्तुत गरेको छ । प्रेमिकालाई हेर्ने नजर मात्र नभई उनलाई बुझ्ने र महसुस गर्ने माध्यम बनेको भाव व्यक्त गरिएको छ । हेर्नुस् भिडियो ।

अन्तिम शेर ‘मिलनको प्रतीक्षा नलम्ब्याउ धेरै, गुलाबी रहरको अधरमा तिमी छौ’ ले मिलनको तीव्र आकांक्षा र प्रेममा रहेको अधीरतालाई उजागर गरेको छ । ‘गुलाबी रहर’ लाई कोमल, मधुर र आत्मिक प्रेमको प्रतीकका रूपमा प्रयोग गरिएको छ, जुन पूर्ण रूपमा फक्रिन लागेको प्रेमको चाहना हो । समग्रमा, गजल ‘नदीमा तिमी छौ’ ले प्रेमलाई आकर्षण मात्र नभई सांसारिक यात्रा, अस्तित्व, समर्पण र आत्माको गहिरो सम्बन्धको रूपमा भावनात्मक र सौन्दर्यपूर्ण ढंगले अभिव्यक्त गरेको छ । यस गजलको संगीत संयोजन लालकाजी श्रेष्ठले गरेका हुन् ।

म्युजिक नेपालको स्टुडियोमा नकुल कार्कीले रेकर्ड गरेको यो गजलको मिक्सिङ मास्टरिङ प्रकाश खरेलले गरेका छन् । गजलको भिडियोलाई ए.जे. अजुले निर्देशन गरेका छन् भने अनिल विष्ट प्युठानीले सम्पादन गरेका छन् । भिडियोमा गायिका बबिना भट्टराई आफै फिचर्ड छिन् । दिपक सापकोटाले हारमोनियम, अनिश गन्धर्वले तबला र सुनिल राईले गितारमा साथ दिएर गजललाई थप कर्णप्रिय बनाएका छन् । भिडियोको श्रृंगार रोजिना श्रेष्ठले गरेकी हुन् ।

@parikalanewsofficial

गजलको अडियो इमेज एफ.एम. ९७.९ मा हरिराम पौडेलले संचालन गर्ने ‘मेची देखि महाकाली सम्म’ कार्यक्रम मार्फत सार्वजनिक गरिएको थियो । भिडियो भने गायिका तथा संगीतकार बबिना भट्टराईको आफ्नै युट्युब च्यानल मार्फत सार्वजनिक भएको छ । गजलकार बिनोद खनालले आफ्नो यो पहिलो रेकर्डेड गजलले आम दर्शक र श्रोताको मन जित्ने विश्वास व्यक्त गरे । गायिका तथा संगीतकार बबिना भट्टराईले यति प्रेमिल भावको गजलमा काम गर्न पाउनुलाई एउटा सुनौलो अवसरको रूपमा लिएको बताइन् । उनले गजललाई सुनेर, हेरेर प्रतिक्रिया दिन र यसको निर्माणमा जोडिएका सम्पूर्ण टिमलाई न्याय दिन आग्रह गरिन् ।

कवि तथा गीतकार प्रमोद भट्टराई ‘प्रतीक’ ले गजलका शेरहरू अत्यन्तै प्रेमिल रहेको र स्वर तथा संगीतको संयोजनले यसलाई सुनिरहूँ लाग्ने बनाएको प्रतिक्रिया दिए । उनले प्रेममा डुबेकाहरूलाई गजलले अझ गहिराइमा पुर्याउन सफल भएको भन्दै सम्पूर्ण टिमलाई बधाई तथा शुभकामना दिए । करिब १६ वर्षको संगीत यात्रामा बबिना भट्टराईले व्यावसायिक गीत, भक्ति संगीत, बाल गीतका साथै नेपाली संगीतमा पहिलो ‘चारु’ गायिका र संगीतकारको रूपमा समेत आफ्नो पहिचान बनाएकी छिन् । उनका ‘हसाउँछौ तिम्रै मर्जी’, ‘काले काले कृष्ण’, ‘मधुराष्टकम्’, ‘जय जय शम्भु’, ‘मनमा बसाएर राम’, ‘अपराजिता’, ‘अल्लारे’ जस्ता विभिन्न शैलीका गीत तथा भजनहरू लोकप्रिय छन् ।