‘सत्य कहिल्यै लुक्दैन’ भन्दै ‘महाभोज’ टिमको रहस्यमय पोस्ट किन ?

इटहरी/ आउँदो जेठ १५ गतेबाट प्रदर्शनमा आउन लागेको फिल्म ‘महाभोज’को टिमले मंगलबार राति अचानक सामाजिक सञ्जालमा एकै प्रकारको रहस्यमय पोस्ट गरेपछि नेपाली फिल्म उद्योग र दर्शकबीच विभिन्न अड्कलबाजी सुरु भएको छ । फिल्मका निर्देशक दिनेश राउतसहित प्रमुख कलाकारहरू दयाहाङ राई, खगेन्द्र लामिछाने, अञ्जना बराइली, मलिका महत, गौमाया गुरुङलगायतले एकसाथ आ-आफ्नो सामाजिक सञ्जाल ह्यान्डलमा ‘सत्य कहिल्यै लुक्दैन’ भन्ने वाक्यांश लेखेका थिए ।

यो साझा र अर्थपूर्ण स्ट्याटस सार्वजनिक भएलगत्तै सामाजिक सञ्जाल तातेको थियो । खासगरी चलचित्रकर्मी, दर्शक र सञ्चारकर्मीहरूले यसको आशयबारे प्रश्न उठाउन थालेका छन् । के यो फिल्म प्रदर्शनअघिको कुनै विशेष प्रचार रणनीति हो, वा यसले फिल्मसँग जोडिएको कुनै गहिरो सत्यलाई सङ्केत गरेको हो भन्नेबारे विभिन्न कोणबाट विश्लेषण भइरहेको छ । प्राप्त जानकारी अनुसार, फिल्म ‘महाभोज’ सहकारी ठगी प्रकरणमा आधारित कथावस्तुमा निर्माण भएको छ ।

फिल्मको विषयवस्तुलाई लिएर प्रमुख अभिनेता दयाहाङ राईले दिएको एक अभिव्यक्तिले पनि यस रहस्यलाई थप गहिर्याएको छ । उनले भनेका छन्, “नेपालमा आर्थिक क्रान्तिको सपना बोकेर सहकारीहरू स्थापना भए, तर त्यसकै पहुँचमा रहेका केही व्यक्तिले सर्वसाधारणको गाढा पसिनाको पैसा लुटे । ‘महाभोज’ त केवल फिल्म होइन, एक यथार्थ प्रश्न हो।”
कलाकारहरूको ‘सत्य कहिल्यै लुक्दैन’ भन्ने साझा भनाइलाई कतिपयले सहकारी पीडितहरूप्रति ऐक्यबद्धताको रूपमा पनि बुझेका छन् ।

@parikalanewsofficial

स्ट्याटसमा कुनै व्यक्ति वा संस्थाको नाम तोकिएको छैन, तर यसको गाम्भीर्यताले फिल्मले कुनै संवेदनशील विषय वा ठूला व्यक्तित्वहरूलाई पर्दाफास गर्न लागेको त होइन भन्ने प्रश्न उब्जिएको छ । फिल्मको कथा, यसको पृष्ठभूमि र अहिले कलाकारहरूले एकै स्वरमा बोलेको यो रहस्यमय वाक्यले ‘महाभोज’ ले केवल मनोरञ्जन मात्र नभई समाजको कुनै लुकाउन खोजिएको यथार्थलाई पर्दामा ल्याउने प्रयास गरेको सङ्केत गर्दछ ।

त्यो ‘सत्य’ के हो? के फिल्मले कुनै वास्तविक घटनामाथि प्रकाश पार्दैछ ? वा यसले गर्दा फिल्ममाथि कुनै किसिमको दबाब सिर्जना भएको छ ? यी सबै प्रश्नहरुको उत्तर अब ‘महाभोज’ प्रदर्शन भएपछि मात्र स्पष्ट हुनेछ । तर, अहिलेलाई यो साझा पोस्टले नेपाली फिल्म वृत्तमा एउटा कौतूहल र बहसको वातावरण सिर्जना गरेको छ, जसले पर्दामा आउन लागेको ‘सत्य’ प्रति दर्शकहरूको उत्सुकता बढाएको छ ।