किरात राईको विवाह संस्कारमा सोल्टी र सोल्टिनीबीचको प्रेम समेटिएको ‘नायुमा’ सार्वजनीक

इटहरी/ किरात राई समुदायको मौलिक संस्कृति र परम्परा, खासगरी विवाह संस्कारलाई सुन्दर ढंगले पर्दामा उतार्दै गायक हसन राई आफ्नो नयाँ गीत ‘नायुमा’ को म्युजिक भिडियो लिएर दर्शकमाझ आएका छन् । यो भिडियोले किरात सभ्यताको एउटा पाटोलाई कलात्मक रूपमा प्रस्तुत गरेको छ । शशि गुरुङको भावपूर्ण शब्द र कर्णप्रिय संगीतमा सजिएको यस गीतलाई गायक हसन राईले स्वर दिएका छन् ।

गीतमा देबेश राईको एरेञ्जमेन्ट सुन्न सकिन्छ । लुङ्टो क्रियशनको प्रस्तुति रहेको यो भिडियो अमर सृष्टा विक्रम राईप्रति समर्पित छ र यसलाई लुङ्टो क्रियशनको आधिकारिक युट्युव च्यानलमार्फत सार्वजनिक गरिएको हो । युवा दर्शकमाझ लोकप्रिय निर्देशक राजेश पुमा राईले यस भिडियोको निर्देशन गरेका छन् । उनले भिडियोमा किरात राईहरुको विवाह संस्कारमा सोल्टी र सोल्टिनीबीचको प्रेम र सम्बन्धलाई केन्द्रित गरेका छन् । हेर्नुस् भिडियो ।

भिडियोमा चर्चित अभिनेत्री एलिशा राई, मोडलिङमा सक्रिय गणेशमान घले र लोकप्रिय हास्यकलाकार उमेश राई (फुलन्देकी आमा) को अभिनय देख्न सकिन्छ । विशेषगरी एलिशा र गणेशमानको जोडीको अभिनयलाई रुचाइने विश्वास गरिएको छ । यसका साथै प्रकाश लिम्बु, शिशम वान्तावा राई, दोस्तिहाङ राई, महेन्द्र राई, खेमराज राई, हाङ्सामा लिम्बु लगायतका कलाकारहरुको पनि भिडियोमा उपस्थिति रहेको छ ।

भिडियोलाई जीवन्त बनाउन हरि हुमागाईको डिओपी र उत्तम हुमागाईको सिनेमाटोग्राफीले महत्वपूर्ण भूमिका खेलेको छ । भिडियोको सम्पादन बिकाश दाहालले गरेका हुन् भने कलाकारहरुको पहिरन सुम्निमा कलेक्सनले उपलब्ध गराएको हो । गायक हसन राई सांगीतिक यात्रामा निरन्तर अघि बढिरहेका छन् । उनले अहिलेसम्म दुई दर्जनभन्दा बढी गीत रेकर्ड गरिसकेका छन् र आधा दर्जन म्युजिक भिडियोमा मोडलिङको अनुभव पनि बटुलेका छन् ।

@parikalanewsofficial

‘नायुमा’ गीत र यसको भिडियोले दर्शक श्रोताको मन जित्नेमा उनी आशावादी छन् । धरान सुरसाझ कलाकेन्द्र र अलंकार म्युजिक एकेडेमीमा बिनोद प्रियदर्शीसँग संगीतको ज्ञान लिएका हसन पाश्र्व गायनमा पनि रुचि राख्छन् र आगामी दिनमा पनि फरक शैलीका गीतहरु पस्कने योजनामा छन् । किरात राई संस्कृतिको एउटा सुन्दर पाटोलाई उजागर गर्ने ‘नायुमा’ म्युजिक भिडियोले सांगीतिक बजारमा आफ्नो छुट्टै चर्चा बटुल्ने अपेक्षा गरिएको छ ।