प्रदीप खड्कालाई शर्मिला पाण्डेको फिल्ममा अफर, उनले ६ महिनापछि समय दिनसक्ने

काठमाडौं/ नेपाली फिल्म उद्योगमा ‘लभ लभ लभ’, ‘आमा’, ‘परस्त्री’ जस्ता सफल फिल्म निर्माण गरिसकेकी स्थापित निर्माता शर्मिला पाण्डेले पुनः नयाँ फिल्म बनाउने भएकी छ । यो फिल्मलाई उनकै छोरा तथा ‘परस्त्री’ निर्देशक सुरज पाण्डेले निर्देशन गर्नेछन् । निर्माता पाण्डेका अनुसार, यो महत्वकांक्षी प्रोजेक्टको सम्पूर्ण छायांकन अमेरिकामा गरिनेछ । यद्यपि निर्माण युनिटले फिल्मको नाम भने सार्वजनीक गरेको छैन ।

फिल्मका लागि मुख्य कलाकारको रुपमा नायक प्रदीप खड्का र गौरव बिष्टसँग प्रारम्भिक चरणको कुराकानी अगाडि बढाइएको छ । हालै नायक प्रदीप खड्कासँगको भेटवार्ता पछि निर्माता पाण्डेले जानकारी दिँदै भनिन्, “प्रदीपजीले करिब ६ महिनापछि समय दिन सक्ने बताउनुभएको छ । उहाँले केही समयपछि अमेरिका गएर निर्देशक सुरजसँग भेटेर स्क्रिप्ट सुन्ने कुरा पनि गर्नुभएको छ ।”

यो फिल्ममा दुई जना नायक रहने र सोही अनुसार प्रदीपका साथै गौरव बिष्टसँग पनि कुराकानी भइरहेको पाण्डेले बताईन् । गौरवसँग निर्माता पाण्डेले यसअघि ‘परस्त्री’ फिल्म निर्माण गरेकी थिइन् भने प्रदीप र गौरव दुवैले ‘पिताम्बर’ फिल्ममा सँगै अभिनय गरिसकेका छन् ।

@parikalanewsofficial

छोरा सुरज पाण्डेले ‘परस्त्री’ मार्फत् निर्देशनमा डेब्यु गरेका थिए । अब आमा शर्मिला र छोरा सुरजको यो सहकार्यमा बन्न लागेको नयाँ फिल्मले दर्शकमाझ कस्तो छाप छोड्छ, त्यो हेर्न बाँकी नै छ । प्रदीप खड्का र गौरव बिष्टको सम्भावित जोडीलाई लिएर अमेरिकामा छायांकन हुने यो फिल्मप्रति फिल्म वृत्तमा चासो बढ्न सुरु भएको छ ।