फिल्म ‘मितज्यू’मा स्मिता लामिछाने अनुबन्धित, दयाहाङ राईसँग पर्दा सेयर गर्दै

काठमाडौं/ गतवर्षको सुपरहिट फिल्म ‘घरज्वाइँ’ निर्माण टिमले बनाउन लागेको प्रतिक्षित फिल्म ‘मितज्यू’मा अभिनेत्री स्मिता लामिछाने अनुबन्धित भएकी छन् । अभिनेत्री लामिछानेलाई उनको जन्मदिनको सुखद अवसर पारेर निर्माण टिमले फिल्ममा भित्र्याएको हो । अनिल बुढा मगरको निर्देशन रहने यस फिल्ममा अभिनेत्री लामिछानेले मुख्य भूमिकामा अभिनेता दयाहाङ राई र तेरिया फौजा मगरसँग पर्दा सेयर गर्नेछिन् ।

दयाहाङ र तेरिया यसअघि नै फिल्ममा अनुबन्धित भैसकेका छन् । जिएम मूभिज प्रोडक्सन र एबीएम सिने प्रोडक्सनको ब्यानरमा निर्माण हुने ‘मितज्यू’को कथा महेश राईले लेखेका हुन् । फिल्मको छायांकन आगामी मंसिरबाट सुरु गर्ने लक्ष्य राखिएको छ । निर्माण टिमले फिल्मलाई आउँदो चैत २७ गते नेपाली नयाँ वर्षको अवसर पारेर प्रदर्शनमा ल्याउने घोषणा गरिसकेको छ ।

निर्माण नियन्त्रक (प्रोडक्सन कन्ट्रोलर) को रुपमा धन बहादुर राई रहेको यस फिल्मका निर्माण टिमले गतवर्ष असार अन्तिममा प्रदर्शन गरेको ‘घरज्वाइँ’ मार्फत दर्शक तथा समीक्षकको मन जित्न सफल भएको थियो । ‘घरज्वाइँ’ले ५१ औं दिन मनाउँदै बक्सअफिसमा राम्रो व्यापार समेत गरेको थियो ।

@parikalanewsofficial

कुसल अभिनेत्री तथा निर्माताको परिचय बनाएकी स्मिता लामिछानेले ‘१२ सत्ताइस’बाट मुख्य अभिनेत्रीको रुपमा नेपाली फिल्ममा पाइला टेकेकी थिइन् । उनको निर्माण तथा अभिनय रहेको फिल्म ‘आँखा’ गतवर्षको असोजमा प्रदर्शनमा आएको थियो भने मुख्य भूमिका रहेको अर्को फिल्म ‘म राजेश हमाल’ प्रदर्शनको तयारीमा रहेको छ । हाल फिल्म ‘मितज्यू’ कथा लेखनको अन्तिम चरणमा रहेको निर्माण पक्षले जनाएको छ ।