अष्ट्रेलियापछि शोभित बस्नेतको ‘पीआर’ नेपालमा, धम्पुसबाट थालियो दोस्रो सेड्युल

काठमाडौं/ नेपाली फिल्म उद्योगमा फरक प्रस्तुति दिने प्रयास स्वरुप निर्देशक शोभित बस्नेतले आफ्नो नयाँ फिल्म ‘पीआर’ को दोस्रो सेड्युलको छायांकन नेपालमा सुरु गरेका छन् । फिल्मको मुख्य हिस्सा, करिब ६० प्रतिशत छायांकन अष्ट्रेलियाका आकर्षक लोकेसनहरुमा सफलतापूर्वक सम्पन्न गरेर केही दिनअघि मात्रै निर्देशक बस्नेत स्वदेश फर्किएका थिए । अब बाँकी ४० प्रतिशत दृश्यहरु नेपालमै खिचिने क्रममा कास्कीको मनमोहक पर्यटकीय स्थल धम्पुसबाट दोस्रो सेड्युलको छायांकन थालिएको हो ।

हालै धम्पुसमा फिल्मको एक वैवाहिक दृश्य कैद गरिएको छ । सो दृश्यमा नेपाली फिल्म उद्योगका दुई सशक्त कलाकार नीर शाह र गौरी मल्लका साथमा युवा कलाकार दिक्पाल कार्की र विनिता कार्कीले अभिनय गरेका छन् । निर्देशक बस्नेतले फिल्मको कथावस्तुको मागअनुसार नै छायांकनलाई अष्ट्रेलिया र नेपालमा विभाजन गरिएको र सोही अनुसार काम भइरहेको जानकारी दिए । धम्पुसमा अहिले धमाधम छायांकन चलिरहेको र त्यसपछि पोखरा, चितवन लगायतका नेपालका अन्य सुन्दर ठाउँमा पनि फिल्मका दृश्यहरु खिचिने योजना रहेको उनले बताए ।

सलोन सलिना फिल्मसको ब्यानरमा निर्माण भइरहेको यस फिल्ममा नीर शाह, गौरी मल्ल, रबिन्द्र खड्का, उत्तम केसी, आर ए सुरज पौडेल, राजन कुँवर, विनिता कार्की, पुजा चौधरी, बिमला खत्री, आस्मा अधिकारी, कुशल थापा, गणेश बुढाथोकी, कृष्ण थापा, म्याक्स र नवीन घायल लगायतका कलाकारहरुको अभिनय रहेको छ । फिल्ममा ए वान ग्रुप सर्भिसका प्रदीप दाहाल र इन्द्रेणी ग्रुपका लक्ष्मण सापकोटा निर्माताको रुपमा जोडिएका छन् ।

@parikalanewsofficial

‘पीआर’मा संगीत संयोजन मानस राज र भिम बिसीले गरेका छन् भने नृत्य निर्देशन रामजी लामिछानेको रहेको छ । फिल्मको कथा निर्देशक बस्नेत आफैंले लेखेका हुन् भने त्यसलाई गणेश बुढाथोकीले पटकथा र संवादमा ढालेका छन् ।
छायांकनतर्फ अष्ट्रेलियाको पाटो सौरभ मानन्धरले सम्हालेका थिए भने नेपालको छायांकनको जिम्मेवारी सौरभ लामाले लिएका छन् । फिल्मलाई बन्दे प्रसादले सम्पादन गर्नेछन् । रामजी राउत, गणेश बुढाथोकी र मणि तामाङ मुख्य सहायक निर्देशकको भूमिकामा छन् भने केवल मान सिंह बस्नेतले निर्माण व्यवस्थापकको कार्यभार सम्हालेका छन् ।