मिलन चाम्सको ‘सुम्निमा’मा उपासना फाइनल, उनका लागी बेलायतको हिरो खोजिँदै

इटहरी/ निर्देशक मिलन चाम्सले आफ्नो आगामी प्रेमकथामा आधारित फिल्म ‘सुम्निमा’को मुख्य अभिनेत्रीको रुपमा उपासना सिंह ठकुरीलाई अनुबन्धित गरेका छन् । नेपाली र अंग्रेजी दुवै भाषामा निर्माण हुने तयारीमा रहेको यो फिल्मका लागि उपासना फाइनल भएसँगै उनको जोडी बन्ने नायकको खोजी पनि सुरु गरिएको छ । फिल्मको निर्माण पक्षले ‘सुम्निमा’का लागि उपासनासँग पर्दामा रोमान्स गर्ने अभिनेताका लागि अडिसन आह्वान गरेको छ ।

विशेष गरी २० देखि २६ वर्ष उमेर समूहका र हाल बेलायत (युके) मा बसोबास गरिरहेका इच्छुक व्यक्तिले यस अडिसनमा सहभागी हुन पाउनेछन् । निर्देशक चाम्सले ‘सुम्निमा’को कथावस्तु युनिभर्सल रहेको र यसलाई अन्तर्राष्ट्रिय बजारसम्म पुर्‍याउने लक्ष्य राखिएको बताएका छन् ।

चाम्स इन्टरटेनमेन्ट र गोर्खा फिल्म्स्को संयुक्त ब्यानरमा निर्माण हुने यो फिल्म चाम्सको ११ औं निर्देशकीय प्रोजेक्ट हो । फिल्ममा राजीव थापाको कथा र पटकथा रहनेछ । हालै मात्र चाम्स निर्देशित बायोपिक फिल्म ‘अञ्जिला’ले प्रदर्शनको ५१ औं दिन पूरा गरी सफलता हासिल गरेको छ ।

@parikalanewsofficial

‘अञ्जिला’को सफलताले ‘सुम्निमा’लाई अझ उत्कृष्ट बनाउनुपर्ने चुनौती चाम्ससामू रहे पनि कथावस्तु र टिम राम्रो बन्ने विश्वासका साथ उनी यो प्रोजेक्ट सफल हुनेमा ढुक्क देखिएका छन् । ‘सुम्निमा’ को छायांकन आगामी जुलाई महिनाबाट नेपाल र बेलायतमा सुरु हुनेछ । फिल्मका अन्य प्राविधिक पक्ष र बाँकी कलाकारका बारेमा भने निर्माण पक्षले पछि जानकारी गराउने बताएको छ ।