पुनः एक्सन फिल्ममा देखिँदै अभिनेत्री पूजा शर्मा

इटहरी/ फिल्म ‘दान्भी’ मार्फत फिल्म निर्देशनमा डेब्यु गरेका रुपेश तामाङ अब आफ्नो दोस्रो प्रोजेक्टको तयारीमा तीव्र रुपमा लागेका छन् । यसपटक उनी अझ बृहत तयारीका साथ मल्टिस्टारर एक्सन फिल्म लिएर आउँदैछन् । निर्माणको प्रारम्भिक चरणमा रहेको यस फिल्मका लागि कलाकार छनोट प्रक्रिया द्रुत गतिमा अघि बढेको छ ।

यसै क्रममा, दर्शकमाझ लोकप्रिय अभिनेत्री पूजा शर्मा यो फिल्मका लागि फाइनल भएकी छिन् । निर्देशक रुपेश तामाङले पूजालाई उनको जन्मदिनको विशेष अवसरमा फिल्ममा अनुबन्धित गरेका हुन् । पूजा शर्मालाई आफ्नो फिल्ममा लिनुको कारण स्पष्ट पार्दै निर्देशक तामाङले भने, ‘मेरो फिल्मको कथावस्तुले नै पूजा शर्मा जस्तो अभिनेत्री खोजेको थियो, त्यसैले हामीले उहाँलाई साइन गरेका हौं। विगतका फिल्मबाट पाठ सिक्दै यसपटक अझ परिष्कृत काम गर्ने कोसिसमा छौं।’

फेरि एकपटक एक्सन जनरामा देखिन लागेकोमा अभिनेत्री पूजा शर्मा निकै उत्साहित छिन् । उनले भनिन्, ‘‘दान्भी’मा दर्शकले मेरो एक्सन भूमिकालाई धेरै मन पराइदिनुभएको थियो । त्यसैले पनि मलाई एक्सन फिल्ममा काम गर्ने ठूलो रहर थियो । रुपेशजीले जब यो उत्कृष्ट कथा लिएर आउनुभयो, मैले तत्कालै फिल्म खेल्ने निर्णय गरें ।’

@parikalanewsofficial

निर्देशक रुपेशका अनुसार, यो फिल्मको अर्को आकर्षण यसको कलाकार छनोट पनि हुनेछ, जसमा दर्शकले केही अप्रत्याशित नामहरु पाउन सक्नेछन् । यद्यपि, फिल्मको औपचारिक नाम भने जुरीसकेको छैन । केही दिनभित्रै फिल्मको नाम चलचित्र विकास बोर्डमा दर्ता गरेर सार्वजनिक गर्ने योजना रहेको निर्माण पक्षले जनाएको छ । सुमन गजमेरले लेखनको जिम्मा लिएको यो फिल्मको छायांकन केही महिनापछि सुरु गरिनेछ ।