फूलपातीमा रिलिज हुने ‘महाराजधिराज’मा आर्यन सिग्देल अनुबन्धित

काठमाडौं/ राष्ट्रिय अवार्ड विजेता फिल्म ‘बुलाकी’का प्रस्तुतकर्ता विराज बिष्ट र समीक्षकबाट रुचाइएको फिल्म ‘प्रेमगञ्ज’का निर्देशक तथा लेखक परिच्छेद सेनको नयाँ सहकार्यमा निर्माण हुन लागेको फिल्म ‘महाराजधिराज’ यतिबेला नेपाली फिल्म वृत्तमा चर्चाको शिखरमा छ । सशक्त टिमको नेतृत्वमा बन्न लागेको यो फिल्ममा एकपछि अर्को गर्दै चर्चित कलाकारहरु जोडिने क्रमले यसको चर्चालाई थप उचाइ दिएको हो ।

यसै क्रममा, पछिल्लो पटक नायक आर्यन सिग्देल ‘महाराजधिराज’को एक मुख्य भूमिकाका लागि अनुबन्धित भएका छन् । आर्यनको प्रवेशले फिल्मको कलाकार लाइनअपलाई झनै बलियो बनाएको निर्माण पक्षले जनाएको छ । ‘महाराजधिराज’मा यसअघि नै नायक पल शाह र रमेश उप्रेती जस्ता लोकप्रिय अनुहारहरु जोडिसकेका थिए । योसँगै जय किशन बस्नेत पनि एक महत्वपूर्ण भूमिकामा देखिने पक्का भएको छ ।

आर्यन, रमेश, पल र जय किशन जस्ता कलाकारहरुको संयोजनले पर्दामा कस्तो छाप छोड्ला भन्ने प्रतीक्षा दर्शकमा बढेको छ र फिल्मप्रतिको अपेक्षा पनि बढेर गएको छ ।
यद्यपि, आर्यन सिग्देल ‘महाराजधिराज’मा कुन विशेष भूमिकामा प्रस्तुत हुनेछन् भन्ने विषयले अहिले दर्शकमाझ थप जिज्ञासा थपेको छ । फिल्ममा अनुबन्धित हुन पाउँदा खुशी व्यक्त गर्दै आर्यनले यो आफ्ना लागि फरक र दर्शकका लागि नयाँ चरित्र हुने बताएका छन् ।

@parikalanewsofficial

विराज बिष्ट प्रस्तुतकर्ता रहेको ‘महाराजधिराज’को निर्देशन परिच्छेद सेनले गर्दैछन्, जसको लेखनमा यो फिल्म तयार भएको हो । फिल्मका निर्माताहरूमा टोपेन्द्र विष्ट, चक्रबहादुर केसी र रवि खड्का रहेका छन् ।

फिल्मको पोस्टर यसअघि नै सार्वजनिक भइसकेको छ । निर्माण पक्षका अनुसार फिल्मका सबै कलाकारहरूको नाम अझै पूर्ण रूपमा सार्वजनिक भइसकेको छैन र केही महत्वपूर्ण कलाकारहरूको घोषणा बाँकी नै रहेको छ, जसले फिल्मको लाइनअपलाई अझै रोचक बनाउने निश्चित छ । आगामी फूलपातीको शुभ अवसरमा प्रदर्शन हुने तयारीमा रहेको ‘महाराजधिराज’ले आफ्नो बलियो टिम, आकर्षक कलाकार लाइनअप र बढ्दो चर्चाका कारण प्रतिक्षित फिल्मको सूचीमा आफ्नो नाम लेखाउन सफल बन्दै गइरहेको अड्कल गर्न सकिन्छ ।