जेष्ठ ३ गते नोरा फतेही र दुर्गेश थापाले ‘दुश्मन हेरेको हेर्यै’गीतमा सँगै प्रस्तुती दिने

काठमाडौँ/ आफ्नो धमाकेदार नृत्य र अभिनयले विश्वभर चर्चा कमाएकी भारतीय अभिनेत्री तथा नृत्याङ्गना नोरा फतेहीले पहिलो पटक नेपालमा आफ्नो प्रस्तुति दिने भएकी छन् । ‘नोरा फतेही लाइभ इन नेपाल’ नामक एक विशेष च्यारिटी कार्यक्रमका लागि उनी आगामी जेष्ठ ३ गते (सन् २०२५ मे १७) काठमाडौँ आउँदैछिन् । यो कार्यक्रम शिक्षाबाट वञ्चित बालबालिकाको सहयोगार्थ आयोजना गरिएको हो । पत्रकार सम्मेलन मार्फत कार्यक्रम आयोजक वल्र्डवाइड फिल्म्स नेटवर्क प्रालिले नोरा फतेहीको नेपाल आगमनको औपचारिक घोषणा गरेको हो ।

‘ह्युुमन रेस्पेक्ट नेपाल’ नामक सामाजिक संस्थालाई सहयोग पुर्याउने उद्देश्यले यो कार्यक्रम गर्न लागिएको आयोजकले जनाएका छन् । वल्र्डवाइड फिल्म्स नेटवर्कका अध्यक्ष देव मगरले मनोरञ्जन क्षेत्रमार्फत सामाजिक कार्यमा योगदान गर्ने लक्ष्यका साथ कार्यक्रम आयोजना गरिएको बताए । उनले नेपालमा नोरा फतेहीप्रतिको आकर्षणलाई मध्यनजर गर्दै कार्यक्रमका लागि अनुरोध गरिएको र नोराले सकारात्मक प्रतिक्रिया दिएको जानकारी गराए । यस कार्यक्रममा नोरा फतेहीका साथै नेपाली कलाकारले पनि आफ्नो कला प्रस्तुत गर्नेछन् ।

कार्यक्रममा सहभागी हुने नेपाली कलाकारहरूको सूची पनि सार्वजनिक गरिएको छ । जसमा गायक दुर्गेश थापा, नृत्याङ्गना तेरिया फौजा मगर, नृत्यकार समर्पण लामा र भ्वाइस अफ नेपाल सिजन ६ का उत्कृष्ट फाइनलिष्टहरू इन्द्रकला राई, रोशन राई, अर्पणा आचार्य, प्रमेश राई, प्रशेस पाण्डेलगायत समावेश छन् । कलाकारका तर्फबाट बोल्दै नृत्याङ्गना तेरिया फौजा मगरले अन्तर्राष्ट्रिय स्तरकी कलाकार नोरा फतेहीसँग एउटै मञ्चमा प्रस्तुति दिन पाउनु आफ्ना लागि ठूलो अवसर भएको बताइन् ।

@parikalanewsofficial

आउँदो जेष्ठ ३ गते बौद्धस्थित हायात होटलको चौरमा यो वृहत् कार्यक्रम आयोजना हुनेछ । कार्यक्रमको इभेन्ट व्यवस्थापनको जिम्मा मनु मिडिया प्रालिले लिएको छ । आयोजकका अनुसार, कार्यक्रममा प्रस्तुति दिन नोरा फतेहीसँगै भारतको मुम्बईबाट २० जनाभन्दा बढी नृत्याङ्गनाको टोली नेपाल आउनेछ । नेपाल आगमनबारे अभिनेत्री नोरा फतेहीले पनि आफ्नो उत्साह व्यक्त गरेकी छिन् । एक श्रव्यदृश्य सन्देशमार्फत उनले नेपालमा पहिलो पटक आउन लागेको र नेपाली दर्शकबाट पाइरहेको मायाप्रति कृतज्ञता व्यक्त गरेकी छिन् ।

सामाजिक कार्यका लागि भइरहेको यस कार्यक्रमलाई सफल बनाउन सबैलाई सहयोग गर्न उनले आग्रह गरिन् । यस विशेष इभेन्टको लागि खल्ती एपमार्फत २ हजार, ४ हजार, ७ हजार र १६ हजार रुपैयाँ दरका टिकटहरू उपलब्ध छन् । कार्यक्रमको अर्को आकर्षणको रूपमा नोरा फतेही र गायक दुर्गेश थापाले ‘दुश्मन हेरेको हेरै’ बोलको गीतमा सँगै स्टेज प्रस्तुति दिने जानकारी आयोजकले दिएको छ । ओसिन सिटौलाले सञ्चालन गर्ने कार्यक्रमका लागि दिउँसो ३ बजेदेखि नै दर्शकहरूलाई प्रवेश दिइने व्यवस्था मिलाइएको छ । नोरा फतेहीका ‘दिलबर दिलबर’, ‘कुसु कुसु’, ‘ओ साकी साकी’, ‘नाच मेरी रानी’, ‘स्नेक डान्स’ जस्ता गीतहरू नेपालमा पनि निकै लोकप्रिय छन् ।