काठमाडौं/ नेपाली फिल्म क्षेत्रमा पछिल्लो समय सर्वाधिक सफल मानिएको बायोपिक फिल्म ‘अञ्जिला’ले प्रदर्शनको ५१ औँ दिन पूरा गरेको अवसरमा भव्य समारोह आयोजना गरी आफ्नो ऐतिहासिक सफलताको खुसी साटासाट गरेको छ । शुक्रवार साँझ सशस्त्र प्रहरी बलको प्रधान कार्यालय, हलचोक, काठमाडौंमा आयोजित विशेष कार्यक्रममा फिल्म टोलीले यस उपलब्धिको जस दर्शक, निर्माता र सम्पूर्ण टिमलाई दिएको छ ।
गत वर्ष फागुन २९ गतेदेखि देशव्यापी प्रदर्शनमा आएको ‘अञ्जिला’ले ४५ वटा शोहरूसहित ५१ दिनसम्म सफलतापूर्वक प्रदर्शन भएको हो । यस क्रममा फिल्मले बक्स अफिसमा १० करोड रुपैयाँभन्दा बढी ग्रस कमाइ गर्दै नेपाली बायोपिक फिल्मको इतिहासमा नयाँ कीर्तिमान कायम गरेको निर्देशक मिलन चाम्सले जानकारी दिए । उनका अनुसार, १० करोड माथिको व्यापार गर्ने र ५१ दिनसम्म चल्ने ‘अञ्जिला’ पहिलो नेपाली बायोपिक फिल्म बनेको छ ।
सफलता उत्सव कार्यक्रममा चलचित्र विकास बोर्डका अध्यक्ष दिनेश डिसी, सशस्त्र प्रहरी महानिरीक्षक राजु अर्याल, चलचित्र विकास बोर्डका पूर्व अध्यक्ष राजकुमार राई लगायत सशस्त्र प्रहरी बलका उच्च पदस्थ अधिकारीहरू, पत्रकारहरू, हल सञ्चालक तथा व्यवस्थापकहरू र अन्य फिल्मप्रेमीहरूको बाक्लो उपस्थिति रहेको थियो । कार्यक्रममा फिल्मको टिम र ५१ दिन चलाएर साथ दिने हल सञ्चालकहरूलाई प्रशंसा पत्र प्रदान गरी सम्मान गरिएको थियो ।
@parikalanewsofficial
समारोहमा सशस्त्र प्रहरी बलका सांस्कृतिक समूहहरूले विभिन्न आकर्षक प्रस्तुति दिएका थिए भने फिल्मका चर्चित गीत ‘रात किन हुन्छ’का गायक तथा सङ्गीतकार थानेश्वर गौतमले प्रत्यक्ष गायन प्रस्तुत गरी माहोल तताएका थिए । नेपाली महिला राष्ट्रिय फुटबल टोलीकी कप्तान एन्जिला तुम्बापो सुब्बाको प्रेरणादायी जीवनगाथामा आधारित यस फिल्ममा स्वयं एन्जिलाले नै मुख्य भूमिका निर्वाह गरेकी छिन् ।
उनीसँगै प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारहरूको अभिनय रहेको छ । निर्देशक मिलन चाम्सले कार्यक्रममा बोल्दै ‘अञ्जिला’को यो सफलता सम्पूर्ण नेपाली फिल्म क्षेत्रका लागि प्रेरणा भएको र यसको श्रेय दर्शक, टिम, पत्रकार र शुभचिन्तक सबैलाई जाने बताए । वर्ष २०८० को अन्त्यतिर रिलिज भएर पनि ‘अञ्जिला’ले सो वर्षका उत्कृष्ट पाँच सफल फिल्ममा आफ्नो स्थान बनाउन सफल भएको थियो ।
Discussion about this post