घर मोह र डेराको यथार्थ: ‘के घर के डेरा: घर नं २’ को ट्रेलर, १० लाख बढी भ्युज

काठमाडौं/ सामाजिक कथावस्तुमाथि गहन फिल्म निर्माणका लागि चिनिने निर्देशक दीपेन्द्र के खनालको नयाँ प्रस्तुति ‘के घर के डेरा : घर नं २’ को प्रतिक्षित ट्रेलर सार्वजनिक भएको छ । शुक्रबार एक विशेष कार्यक्रमका बीच सार्वजनिक गरिएको ट्रेलरले घर र डेराबीचको भिन्नता, घरप्रतिको मोहले निम्त्याउने सामाजिक र पारिवारिक जटिलतालाई मार्मिक ढंगले प्रस्तुत गरेको छ । सार्वजनिक भएको २३ घण्टामै ट्रेलरले १० लाख बढी भ्युज प्राप्त गर्न सफल भएको छ । यो एक हिसाबले सकारात्मक पक्ष हो । ट्रेलरमा २४ हजार बढी लाईक तथा झण्डै ४ सय कमेन्ट आएको छ ।

ट्रेलरले अहिलेको समाजमा घरलाई प्रतिष्ठाको प्रतीक मान्ने यथार्थलाई चित्रण गर्दै घर जोगाउन वा बनाउनका लागि युवा पुस्ताले गरिरहेको संघर्ष र त्यसले सिर्जना गर्ने नकारात्मक परिणामहरुलाई उजागर गरेको छ । घर मोहले आर्थिक कारोबारमा ल्याउने गडबडी र परिवारमा पर्ने असरलाई निर्देशक खनालले ट्रेलरमा प्रष्टसँग देखाएका छन् । ‘पशुपतिप्रसाद’, ‘आमा’, ‘चिसो मान्छे’ जस्ता सफल तथा प्रशंसित फिल्म दिएका निर्देशक खनालको यो नयाँ फिल्मले घर र डेराको फरक बसाइले जीवनमा पार्ने प्रभावको कथा भन्नेछ । हेर्नुस् ट्रेलर।

निर्देशक खनालका अनुसार, घर र डेराका कारण जीवनमा जतिसुकै उतारचढाव आए पनि अन्ततः त्यसको अन्तिम प्रभाव कस्तो हुन्छ भन्ने विषयलाई फिल्मले गहन रूपमा उठाउनेछ ।
फिल्मको कथावस्तु साहित्यकार बुद्धिसागरले लेखेका हुन् । यो उनको पहिलो फिल्म लेखन हो । एप्पल इन्टरटेन्मेन्ट, ए प्लस इन्टरटेन्मेन्ट तथा नटराज क्रिएसनको प्रस्तुतिमा निर्माण भएको यस फिल्ममा कृष्णबहादुर थापाको छायांकन रहेको छ ।

@parikalanewsofficial

फिल्मका निर्माताहरुमा नकिमउद्दिन, शरद श्रेष्ठ र किरण महर्जन रहेका छन् भने कार्यकारी निर्माताको जिम्मेवारी युवराज कार्कीले सम्हालेका छन् । जीवनको यथार्थसँग जोडिएको घर र डेराको कथा बोकेको ‘के घर के डेरा : घर नं २’ आगामी जेठ २ गतेदेखि देशभर प्रदर्शनमा आउने तयारीमा छ । सार्वजनिक ट्रेलरले फिल्मप्रति दर्शकमा उत्सुकता जगाएको छ ।