२४ घण्टा नपुग्दै बलिदान प्रि-टिजर ट्रेण्डिङको शीर्ष स्थानमा, समीर भट्टको खतरानाक एक्सन

इटहरी/ छायाङकन देखि नै बहुप्रतिक्षित बनिरहेको फिल्म “बलिदान” को हालै सार्वजनीक प्रि टिजर ट्रेण्डिङ को पहिलो स्थानमा पुगेको छ । यो फडको सार्वजनिकको २४ घण्टा नपुग्दै हो । फिल्मका मुख्य अभिनेता समीर भट्टको जन्मदिनको उपहार स्वरुप बुधबार सार्वजनिक टिजर यो समाचार तयार गर्दै गर्दा युट्युब ट्रेण्डिङको मुभी क्याटोगरी अन्तर्गत शीर्ष स्थानमा छ भने ५ लाख बढी पटक हेरिएको छ ।

२४ हजार बढीले लाईक गरेको उक्त प्रि टिजरमा ३ हजार बढीले सकारात्मक प्रतिक्रिया दिएका छन् । अधिकांशले समीर भट्टको खुलेर तारिफ गरेका छन् भने फिल्मको व्यग्र प्रतीक्षा सो कमेन्टहरुमा व्यक्त भएका छन् । फिल्मका निर्देशक सन्तोष सेनका अनुसार नेपाल सहित विश्वको १२ देशमा यो प्रि टिजरले ट्रेण्डिङको यात्रा सुरु गरिसकेको छ । उनी भन्छन् “फिल्मको पहिलो झिल्कोलाई नै दर्शकले अत्याधिक रुचाउनुभएको छ, अब अझै उत्साह थपिएको छ ।” हेर्नुस् प्रि टिजर ।

यही वर्षको वडा दसैँलाई लक्षित गर्दै फूलपातीमा प्रदर्शन मिति तोकिएको ‘बलिदान’को ४२ सेकेन्डको प्रि-टिजरमा समीरलाई सोलो फिचर्ड गर्दै उनको धमाकेदार एक्सनलाई केन्द्रमा राखिएको छ । सार्वजनिक गरिएको छोटो प्री-टिजरले बलिदान फिल्मको शक्तिशाली कथावस्तु र प्रस्तुतिको संकेत गर्छ । प्रि-टिजरको पृष्ठभूमिमा सुनिने “देशको चिन्ता । माटोले खोज्दै छ जसलाई, जन्माइन आमाले उसलाई, रगत उम्लियो जसको, आमाको पिर, यो देशको शिर, कहिल्यै झुक्न नदिने सपुत हुँ म’ भन्ने संवादले देशभक्तिको भावनालाई उजागर गर्छ ।

टिजरमा समीरको अन्तिममा आउने आक्रोशपूर्ण चित्कारले कौतूहलता थपेको छ । निर्देशक सेनले समीर भट्टलाई अभिनयमा अब्बल भन्दै ‘बलिदान’मा उनको क्षमता अझ प्रस्फुटित भएको बताए । उनले भने, “यो प्रि-टिजर समीरको प्रस्तुतिको सानो नमुना मात्र हो, हामी क्रमशः अरू झलकहरू पनि दर्शकमाझ ल्याउनेछौँ ।”

@parikalanewsofficial

‘आसुसेन फिल्म्स् प्रा.लि.’ को ब्यानरमा निर्माण भएको यस फिल्ममा समीरका अलावा सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी, प्रेम पुरी जस्ता कलाकारहरूको पनि अभिनय रहेको छ । पवन ब्राडफोर्ड बिस्ट निर्माता रहेको फिल्ममा प्रेम पुरी कार्यकारी निर्माता हुन् । यो प्रि-टिजरले फिल्मप्रति दर्शकको चासो बढाएको छ ।