फिल्म ‘बिगुल’को परेवा उडाएर शुभमुहूर्त, वैशाख तेश्रो साताबाट छायांकन

इटहरी/ रमेश कोइरालाको निर्देशनमा बन्न लागेको नयाँ नेपाली फिल्म ‘बिगुल’ को शुभमुहूर्त सम्पन्न भएको छ । सामाजिक जागरण, समसामयिक राजनीति र आम नागरिकको कर्तव्यबोध जस्ता महत्वपूर्ण विषयवस्तुमा बन्ने यस फिल्मको शुभ मुहूर्त आज (बुधबार) अक्षय तृतियाको शुभ अवसर पारेर कोटेश्वर महादेवस्थानमा सम्पन्न भएको हो । मुहूर्त समारोहमा फिल्मको मूलभावलाई प्रतिकात्मक रुपमा प्रस्तुत गरियो ।

मुहूर्त सर्टमा अभिनेता नरेन खड्काले “समाज जागरणको बिगुल” स्वरुपको संवाद बोलेपछि अभिनेत्री बेनिशा हमालले एक जोडी परेवा उडाएकी थिइन्, जसले फिल्मको सन्देश र उद्देश्यलाई प्रारम्भमै संकेत गर्‍यो । मुहूर्त कार्यको औपचारिक सुरुवात गर्दै चलचित्र बिकास बोर्डका पूर्व सदस्य राजेन्द्र केसीले क्यामेरा स्विच अन गरे भने निर्देशक प्रदिप श्रेष्ठले क्ल्याप हाने ।

चलचित्र निर्देशक समाजका अध्यक्ष जनकदीप पराजुलीले निर्देशन गरेको मुहूर्तमा निर्देशक सुचित्रा श्रेष्ठले नरिवल फोडेर फिल्मको सफलताको लागि शुभकामना व्यक्त गरिन् । म्याग्नोलिया ग्रुपको ब्यानरमा निर्माण हुने यस फिल्ममा दिनेश कोइरालाको कथा, मौनता श्रेष्ठको पटकथा र संवाद रहेको छ । शिब ढकालले फिल्मको छायांकन गर्नेछन् । कल्पना पौडेलको प्रस्तुति रहेको ‘बिगुल’का निर्माताहरु महेश कोइराला र सूर्यकान्त कोइराला हुन् ।

@parikalanewsofficial

फिल्ममा कलाकार नरेन खड्का र बेनिशा हमालका साथमा नीर शाह, रमेश बुढाथोकी, गीता अधिकारी, हेमन्त बुढाथोकी, जेएन घिमीरे, सुमोद भारद्वाज, बिनयराज पौडेल, सुपा खनाल, बबि भारती, तुलसी लम्साल, जयन्त रेग्मी, बिकास अधिकारी लगायतका अनुभवी तथा नयाँ कलाकारहरुको अभिनय रहनेछ । बालकलाकार श्रेयान्सी थपलीयाले पनि महत्वपूर्ण भूमिका निर्वाह गर्दैछिन् ।

फिल्ममा संगीत अर्जुन पोखरेल र मनोज चौलागाईको रहनेछ । विशेषगरी, एक गीतमा नेपाली कांग्रेसका महामन्त्री बिश्वप्रकाश शर्माले शब्द दिएका छन् । फिल्ममा कविराज गहतराजले कोरियोग्राफी सम्हाल्नेछन् भने श्याम केसी निर्माण ब्यबस्थापकका रुपमा रहेका छन् ।

निर्माण पक्षका अनुसार फिल्मको छायांकन बैशाख तेश्रो साताबाट चितवनबाट सुरु गरिनेछ । मुहूर्त समारोहमा नेपाल जेसिसका पूर्व अध्यक्ष फूलकुमार लालवानी, त्रिभुवन बिश्वबिद्यालयका पूर्व सहायक डिन बिष्णुहरि कोइराला, नेपाल सरकारका पूर्व सहसचिव लक्ष्मी बिलास कोइराला, चितवन काठमाडौं सम्पर्क समाजका अध्यक्ष ऋषिश्वर थपलिया, निर्देशक ऋषि लामीछाने लगायत विभिन्न क्षेत्रका विशिष्ट व्यक्तिहरुको उपस्थिति रहेको थियो ।