‘शिवांश: च्याप्टर १’: साङ्लोमा बाँधिएका प्रवीण खतिवडासँगै प्रमुख भूमिकामा देखिँदै रुशा न्यौपाने

इटहरी/ फलामको साङ्लोले कसिएका एक पात्र अनि पृष्ठभूमिमा जल्दै गरेको सिंगो गाउँ । यस्तै रहस्यमय दृष्य समेटिएको फस्टलुक पोस्टर सार्वजनिक गर्दै नेपाली फिल्म ‘शिवांश: च्याप्टर १’ को औपचारिक घोषणा गरिएको छ । बुधबार निर्माणपक्षले सार्वजनिक गरेको पोस्टरले फिल्मको कथावस्तुप्रति दर्शकमा गहिरो कौतुहलता जगाएको छ ।

पोस्टरमा अभिनेता प्रवीण खतिवडालाई आधा अनुहार मात्र देखिने गरी साङ्लोमा बाँधिएको अवस्थामा प्रस्तुत गरिएको छ, जसले उनी कुनै ठूलो सङ्घर्ष वा नियन्त्रणमा परेको आभास दिन्छ । पछाडि दन्किरहेको आगोको ज्वालाले फिल्म शक्ति संघर्ष वा विद्रोहको कथामा आधारित हुन सक्ने सङ्केत दिएको छ । यद्यपि, निर्माणपक्षले कथावस्तुबारे भने विस्तृत जानकारी दिएको छैन ।

अञ्जान सिनेमा प्रोडक्सन हाउसको ब्यानरमा निर्माण हुन लागेको यो फिल्म सन्तोष कुमार आत्रेयको निर्देशकीय डेब्यु फिल्म हो । फिल्मको कथा निर्माता स्वयं अञ्जान केसीले लेखेका हुन् । यसको सह-निर्मातामा शोभा भण्डारी र अनिस केसी बोगटी छन् भने पटकथा बारत लिम्बुले तयार पारेका छन् । ‘शिवांश: च्याप्टर १’ मा प्रवीण खतिवडासँगै तेज गिरी र रुषा न्यौपाने मुख्य भूमिकामा देखिनेछन् ।

@parikalanewsofficial

फिल्ममा विकास जोशी, विमला लिम्बु, प्रदीप कुमार चौधरी, सबिर चुरौटे, उदय कुमार सुब्बा, टिका निरौला लगायत कलाकारहरूको पनि अभिनय रहनेछ । फिल्मको संगीतमा न्ह्यू बज्राचार्य र राजनराज शिवाकोटी रहनेछ । गीतमा राजनराज शिवाकोटी र विप्लव प्रतीकले शब्द तयार गरेका छन् भने राजनराज शिवाकोटी, मिलन नेवार र समीक्षा अधिकारीले स्वर दिएका छन् ।

फिल्ममा मिलन श्रेष्ठको निर्देशनमा द्वन्द्व कोरियोग्राफ गरिनेछ भने नृत्य निर्देशन विक्रम चोहानले गर्नेछन् । सरद महतोको सिनेमाटोग्राफी रहेको फिल्ममा बारत लिम्बु मुख्य सहायक निर्देशक, सुलक्षण भारती स्क्रिप्ट डक्टर र सम्भू थापा कार्यकारी निर्माता छन् । भीएफएक्स डाइरेक्टर तथा सुपरभाइजर विराज खड्का र भीएफएक्स प्रोड्युसर आदेश सुब्बा छन् । कस्ट्युम कमल मिश्र र मेकअप तुलसा लिम्बूको रहनेछ ।

पोस्टर फोटोग्राफी युवाहाङ राईले गर्नेछन् भने आर्ट डिरेक्टर तथा प्रोडक्सन डिजाइनर प्रतीक चौधरी हुन् । प्रोडक्सन म्यानेजरको जिम्मेवारी मिलन मानन्धरले सम्हालेका छन् । फिल्मको पोस्ट–प्रोडक्सन कार्य चलचित्र चौतारीले गर्नेछ भने वितरणको जिम्मा डिजिटल सिनेमा नेपाल (डीसीएन)ले पाएको छ । ‘शिवांश: च्याप्टर १’ आगामी असोज २४ गतेबाट देशभर प्रदर्शनमा आउने तयारीमा रहेको निर्माण टिमले जनाएको छ ।