मनछुने कथा बोकेको फिल्म ‘ऊनको स्वीटर’को ट्रेलर सार्वजनिक

इटहरी/ प्रतीक्षित नेपाली फिल्म ‘ऊनको स्वीटर’ले आफ्नो ट्रेलर मङ्गलवार काठमाडौंमा एक विशेष साङ्गीतिक कार्यक्रमका साथ सार्वजनिक गरेको छ । वैशाख २६ गते विश्वव्यापी रिलिजको तयारीमा रहेको आर्टमाण्डू प्रा.लि.को यो पहिलो फिचर फिल्म कोशी प्रदेशको पाँचथर जिल्लाको यथार्थवादी सामाजिक कथावस्तुमा आधारित छ । प्रज्ञा प्रतिष्ठानमा आयोजित भव्य कार्यक्रममा फिल्मको ट्रेलर सार्वजनिक गरिनुका साथै चर्चित गायक सुजन चापागाईँको ब्यान्ड ‘सुजन चापागाईँ एन्ड इन्फिनिटी’ले विशेष कन्सर्ट प्रस्तुत गरेको थियो ।

कार्यक्रममा पत्रकार, कलाकार तथा विभिन्न क्षेत्रका विशिष्ट व्यक्तिहरूको बाक्लो उपस्थिति रहेको थियो । फिल्मका निर्देशक नवीन चौहानले ‘ऊनको स्वीटर’को कथा पाँचथरदेखि भारतको वेस्ट बङ्गालको सीमासम्म फैलिएको जानकारी दिए । उनले एउटा फिल्म बनाउने सपना सुरुमा आफू एक्लैले देखे पनि अहिले त्यो सयौँ जनाको साझा सपना बनेको र यो यात्रा निकै चुनौतीपूर्ण रहेको अनुभव सुनाए । “मैले एउटा फिल्मको संसार बनाउने प्रयास गरेको हुँ । सुरुमा म एक्लैले देखेको सपना अब सयौँ जनाको भएको छ,” चौहानले भने । हेर्नुस् ट्रेलर।

फिल्मका मुख्य अभिनेता विपिन कार्कीले पाँचथरमा छायाङ्कनको क्रममा प्राप्त सहयोगको स्मरण गर्दै सबै पाँचथरे सहयोगीप्रति आभार व्यक्त गरे । उनले आर्टमान्डूका गीतहरू जस्तै यो फिल्म पनि उत्कृष्ट बनेको र दर्शकको मन जित्नेमा आफू विश्वस्त रहेको बताए । मुख्य अभिनेत्री मिरुना मगरले फिल्ममा आफूले निभाएको फुलु गुरुङको पात्रबाट ‘ऊनको स्वीटर’जस्तै न्यानोपन दर्शकसम्म पुर्‍याउने प्रयास गरेको बताइन् । उनले यो फिल्म हेरेपछि आर्टमान्डूले सुरुआत गरेको फिल्मको बेग्लै संसारमा पुगिने दाबी गरिन् ।

@parikalanewsofficial

कार्यक्रममा उपस्थित अन्य कलाकारहरूले पनि फिल्म निर्माणको अनुभव बाँडे । भावना खपाङ्गी मगरले आफूलाई फिल्मका रङ्गीचङ्गी धागोमध्ये एक धागो भएको महसुस भएको बताइन् भने परीक्षा लिम्बूले निर्देशक चौहानको क्यानभासमा काम गर्न पाउनुलाई भाग्यको कुरा भएको भन्दै एक वर्षपछि प्रचारमा सहभागी हुन पाएकोमा खुसी व्यक्त गरिन् । एलेक्स पारसले आफ्नो काम सबैमाझ बसेर हेर्न पाउँदा आनन्द लागेको बताए भने सुरज तमुले यो फिल्म आफ्नो लागि रमाइलो र महत्त्वपूर्ण यात्रा बनेको अनुभव सुनाए ।

फिल्ममा गीत निर्देशनको जिम्मेवारी सम्हालेका गायक सुजन चापागाईँले लामो यात्रामा दुःख र सुखसँगै धेरै कुरा सिक्न पाएको अनुभव सुनाउँदै दर्शकको माया पाएका आफ्ना गीतजस्तै फिल्मलाई पनि माया गरिदिन आग्रह गरे । ‘ऊनको स्वीटर’मा विपिन कार्की, मिरुना मगर, एलेक्स पारस, परीक्षा लिम्बू, सुरज तमु, भावना खपाङ्गी मगरका साथै विल्सन विक्रम राई, सुनिल पोखरेल, माओत्से गुरुङ, प्रेम सुब्बालगायतका कलाकारहरूको अभिनय रहेको छ । सुजन चापागाईँ र झुमा लिम्बुको सङ्गीत तथा नवीन चौहानको लेखन र निर्देशनमा बनेको यो फिल्मले नेपाली समाजका सांस्कृतिक विविधता, सामाजिक अन्तर्विरोध र जीवन्त रङ्गहरूलाई एउटै कथामा बुन्ने प्रयास गरेको निर्माण पक्षले जनाएको छ ।