धरानमा ‘ऊनको स्वीटर साँझ’: फिल्म प्रवर्द्धनसँगै धरानको श्रम संस्कृतिको लागि सहयोग गर्ने घोषणा

इटहरी/ प्रदर्शनको तयारीमा रहेको फिल्म ‘उनको स्वीटर’ को यतिबेला प्रचार प्रसारलाई तिब्र बनाइएको छ । यही २६ गतेदेखि प्रदर्शनमा आउने ‘उनको स्वीटर’ फिल्म निर्माण कम्पनी आर्टमान्डुले आफ्नो पहिलो फिल्म रिलिजअघि धरानमा एक बृहत साँस्कृतिक कार्यक्रमको आयोजना गर्ने तयारी गरिरहेको छ ।

निर्माण कम्पनीले यस कार्यक्रम मार्फत फिल्मको प्रवर्द्धनका साथै धरान उपमहानगरपालिकाको श्रम संस्कृति अभियानलाई आर्थिक सहयोग गर्ने घोषणा गरेको छ । यही बैशाख १८ गते (मंगलबार) साँझ ५ बजे धरान रंगशालामा हुने यस विशेष कार्यक्रमलाई ‘ऊनको स्वीटर साँझ’ नाम दिइएको छ । कार्यक्रममा चर्चित गायक सुजन चापागाईं तथा दि इन्फिनिटी ब्यान्डले आफ्नो सांगीतिक प्रस्तुति दिनेछन् ।

साथै, कार्यक्रममा फिल्म युनिट सँगै फिल्मका प्रमुख कलाकारहरू समेत उपस्थिति रहने जनाइएको छ । पछिल्लो समय यो फिल्मको ‘धान सुक्यो रापले, फकाउछ काफ्ले’ गीत बहुचर्चित बनिरहेको छ । यस गीतका गायक समेत हुन् सुजन चापागाईं भने यो गीतको गायिका तथा संगितकार झुमा लिम्बुको पनि उपस्थीती तथा प्रस्तुती रहने छ ।

@parikalanewsofficial

आर्टमान्डुले सम्पूर्ण संगीतप्रेमी, फिल्मप्रेमी, साहित्यिक मनहरु तथा दर्शक श्रोताहरुलाई उक्त साँझ धरान रंगशालामा उपस्थित हुन आधिकारिक रुपमा निमन्त्रणा गरेको छ । कम्पनीका अनुसार, यो कार्यक्रम अन्तराष्ट्रिय श्रमिक दिवसको अवसर पारेर आयोजना गरिएको हुनाले यसको मुख्य उद्धेश्य श्रम संस्कृतिको प्रवर्द्धनमा योगदान पुर्याउनु रहेको छ ।

कार्यक्रमबाट संकलन हुने रकम मध्ये सम्पूर्ण खर्च/लागत कटौती गरी प्राप्त हुने सम्पूर्ण नाफा धरान उपमहानगरपालिकालाई सहयोगार्थ हस्तान्तरण गरिने आर्टमान्डुले प्रतिबद्धता व्यक्त गरेको छ । फिल्म प्रवर्द्धन र सामाजिक उत्तरदायित्वलाई एकसाथ जोड्ने यस कार्यक्रमले धरानको कला, संस्कृति र श्रम अभियानमा टेवा पुग्ने विश्वास लिइएको छ । फिल्मको लेखन तथा निर्देशन नवीन चौहानले गरेका हुन् भने सागर बुढाथोकी र मिलन खत्री कार्यकारी निर्माता हुन् ।