‘के घर के डेरा : घर नं २’: खगेन्द्र, निश्चल र आर्यन मध्ये को हुन् डेरावाल र घरभेटी ?

इटहरी/ नेपाली फिल्म उद्योगमा सामाजिक कथावस्तुमाथि सफल फिल्म निर्माणका लागि परिचित निर्देशक दीपेन्द्र के खनाल आफ्नो नयाँ प्रस्तुति लिएर आउँदैछन् । ‘पशुपतिप्रसाद’, ‘आमा’, ‘चिसो मान्छे’ जस्ता प्रशंसित फिल्म दिएका खनालको आगामी फिल्म ‘के घर के डेरा : घर नं २’ आगामी जेठ २ गतेबाट देशव्यापी प्रदर्शनमा आउने तयारीमा छ । यो फिल्मले आम नेपाली समाजको यथार्थ चित्रण गर्दै घर र डेराको बसाइँले मानिसको जीवनमा पार्ने फरक प्रभावको कथा भन्नेछ ।

खासगरी घर वा डेराको कारण समाजले लाद्ने सामाजिक हैसियत (सोसल स्टाटस) र त्यसबाट उत्पन्न हुने उचनिच व्यवहारको कथाव्यथालाई पर्दामा उतार्ने निर्देशक खनालले बताएका छन् । उनले फिल्मले जीवनको अन्त्यसम्ममा घर र डेराको यो फरकले पार्ने गहिरो प्रभावलाई पनि उजागर गर्ने जानकारी दिए । फिल्मको मुख्य आकर्षणमध्ये एक यसमा रहेका कलाकारहरूको भूमिका हो ।

@parikalanewsofficial

खगेन्द्र लामिछाने, निश्चल बस्नेत, उपासना सिंह ठकुरी, आर्यन सिग्देल, केकी अधिकारी र प्रकाश घिमिरेललगायतका कलाकारहरू मुख्य भूमिकामा छन् । यद्यपि, फिल्ममा को घरभेटी हुन् र को डेरावाल भन्ने कुराले दर्शकमा उत्सुकता जगाएको छ । सार्वजनिक पोस्टरहरूमा सबै कलाकारहरूको लुक्स उस्तै देखिए पनि एउटा पोस्टरमा खगेन्द्र लामिछाने साइकल डोर्याइरहेको र टिजरमा उनलाई केही दुखी पात्रको रूपमा प्रस्तुत गरिएकाले उनी डेरावाल हुनसक्ने सामान्य अनुमान गरिएको छ ।

तर, यदि उनी डेरावाल हुन् भने घरभेटी आर्यन सिग्देल हुन् कि निश्चल बस्नेत ? यस विषयमा भने निर्देशकले कुनै जानकारी सार्वजनिक गरेका छैनन् । फिल्मको नाममा ‘घर नं २’ जोडिए पनि निर्देशक दीपेन्द्र के खनालले यो फिल्म अघिल्लो ‘के घर के डेरा’ को सिधा सिक्वेल नभएको स्पष्ट पारेका छन् । तर, यसले घर र डेरा कै कथालाई फरक कोणबाट प्रस्तुत गर्ने उनको भनाइ छ । यो फिल्म साहित्यकार बुद्धिसागरको पहिलो फिल्मी कथा हो । कथा लेखन उनैले गरेका हुन् । एप्पल इन्टरटेन्मेन्ट, ए प्लस इन्टरटेन्मेन्ट तथा नटराज क्रिएसनको संयुक्त प्रस्तुतिमा निर्माण भएको यो फिल्ममा कृष्णबहादुर थापाको छायांकन रहेको छ । फिल्मका निर्माताहरूमा नकिम उद्दिन, शरद श्रेष्ठ र किरण महर्जन छन् भने युवराज कार्की कार्यकारी निर्माताको रूपमा रहेका छन् ।