सुशान्त केसीको ‘बार्दली’ गीतको हिन्दि भर्सन ‘उफ’ टि-सिरिजबाट सार्वजनिक

इटहरी/ नेपाली संगीत उद्योगका लागि एक महत्वपूर्ण कदम मानिएको छ गायक तथा गीतकार सुशान्त केसीको पछिल्लो सफलता । उनको चर्चित नेपाली गीत ‘बार्दली’ अब हिन्दी भाषामा ‘उफ्’ नामले विशाल भारतीय म्युजिक कम्पनी टी-सिरिज मार्फत सार्वजनिक भएको छ र यसले भारतीय बजारमा राम्रो चर्चा बटुल्ने अपेक्षा गरिएको छ । सो गीतको भिडियो टी-सिरिजको प्रस्तुति मै तयारी भएको हो ।

नेपाली गीतबाट चर्चा कमाएका केसीले आफ्नो हिट ट्र्याकलाई हिन्दीमा रूपान्तरण गरी ठूलो प्लेटफर्मबाट रिलिज गर्नुलाई उनको सांगीतिक यात्राको महत्वपूर्ण उपलब्धिको रूपमा हेरिएको छ । सार्वजनीक हिन्दी भर्सनमा गायिकाको पार्टलाई भने नेपाली भाषामै राखिएको छ । सो, पार्ट नेपाली र हिन्दी दुवै भर्सनमा इन्द्रकला राईको स्वर सजिएको छ । गीतको संगीत र शब्द स्वयम् सुशान्त केसीले तयार पारेका हुन् । हेर्नुस् भिडियो।

गीतको भिडियोलाई पनि उत्तिकै आकर्षक बनाइएको छ, जसको निर्देशन नयन राईले गरेका छन् । यस भिडियोमा सुशान्त केसीसँगै लोकप्रिय अभिनेत्री स्वस्तिमा खड्काले जीवन्त अभिनय गरेकी छन् । गीतको प्राविधिक पक्षलाई पनि उत्तिकै ध्यान दिइएको छ । कोबिड बज्राले गीतको मिक्सिङ गरेका छन् भने श्याम खड्काले उत्पादन व्यवस्थापन सम्हालेका छन् । भिडियोमा समावेश सुन्दर कोरियोग्राफी कृतिका बरालको रहेको छ भने रुपेश श्रेष्ठले क्यामेराको जिम्मा लिएका छन् ।

@parikalanewsofficial

‘बार्दली’को हिन्दी भर्जनले प्रेमका रंगहरूलाई रोमान्टिक शैलीमा प्रस्तुत गरेको छ । सुशान्त केसीको आफ्नै मौलिक गायन शैली र प्रस्तुतिले हिन्दी भाषी दर्शक तथा श्रोताको मन जित्न सफल हुने विश्वास गरिएको छ । टी-सिरिज जस्तो प्रतिष्ठित कम्पनीबाट गीत रिलिज हुनुले नेपाली कलाकारहरूलाई अन्तर्राष्ट्रिय बजारमा पुग्न र नेपाली भाषाको प्रवर्द्धनमा थप प्रोत्साहन मिल्ने अपेक्षा गरिएको छ । गीत सार्वजनिक भए लगत्तै युट्युब लगायत विभिन्न डिजिटल प्लेटफर्ममा यसले राम्रो प्रतिक्रिया पाइरहेको छ ।