युट्युवमा ‘जन्ते बाख्रो’को दोस्रो गीत ‘अङ्गुरको झुप्पो’

इटहरी/ नेपाली समाजमा बेहुली भित्र्याउँदा जन्तीलाई खुवाइने भोजलाई ‘जन्ते बाख्रो’ भनिन्छ । यही रोचक परम्पराको पृष्ठभूमिमा आधारित सामाजिक कमेडी फिल्म ‘जन्ते बाख्रो’ प्रदर्शनको तयारीमा छ । सिमोस सुनुवारको निर्देशनमा निर्माण भएको यस फिल्मको प्रचारप्रसारका क्रममा दोस्रो गीत ‘अङ्गुरको झुप्पो’ सार्वजनिक गरिएको छ । शुक्रबार सार्वजनिक गरिएको उक्त गीतमा महेश काफ्लेको शब्द रचना र कम्पोजिशन रहेको छ ।

रिकेश गुरुङले एरेञ्ज, मिक्सिङ्ग र मास्टरिङ्ग गरेको यस गीतमा महेश काफ्लेलाई अस्मिता अधिकारीले स्वरमा साथ दिएकी छन् । सार्वजनिक भिडियोमा फिल्मकाका मुख्य कलाकार आशिफ शाह र गरिमा शर्मा फिचर्ड छन् । भिडियोमा आशिफले गीत मार्फत् गरिमाको तारिफ गर्दै फकाउने प्रयास गरेको र उनीहरु बीचको प्रेमिल भाव प्रस्तुत गरिएको देख्न सकिन्छ । हेर्नुस् भिडियो।

मुईन इन्टरटेनमेन्टको प्रस्तुति रहेको यस फिल्ममा आशिफ र गरिमाका अलावा सौगात मल्ल, रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, समापिका गौतम, कुशल गजमेर लगायतका कलाकारको अभिनय रहेको छ । प्रदीप भारद्धाजको कथा, पटकथा र संवाद रहेको ‘जन्ते बाख्रो’ को निर्माता सन्तोष गौतम हुन् ।

सामाजिक कमेडी कथावस्तुमा बनेको यो फिल्म आगामी जेठ २३ गतेबाट नेपाल र विदेशमा एकसाथ प्रदर्शन हुँदैछ । फिल्ममा हरि हुँमागाईको डिओपी, उत्तम हुँमागाईको सिनेमाटोग्राफी, सुनिल शिवभक्तिको सम्पादन र रोयल भिमसेन (ट्राइडेन्ट कन्सेप्ट टिम) को पोस्टर डिजाइन रहेको छ । यसको वितरण टिफल्क फिल्मस्ले गर्नेछ भने डिजिटल राइट्स जी टु वान डिजिटलले खरिद गरेको जनाइएको छ ।