दुईसय पच्चीस वर्ष पुरानो नेपाली समाजको दुर्लभ कथा ‘जार’ मार्फत पर्दामा आउँदै

इटहरी/ करिब दुई सय पच्चीस वर्ष पुरानो नेपाली समाजको एक यथार्थ घटनामा आधारित रहेर निर्माण गरिएको फिल्म ‘जार’ प्रदर्शनका लागि तयार भएको छ । साहित्यकार इन्द्रबहादुर राईको ऐतिहासिक कथामा आधारित यो फिल्म यही वैशाख २६ गतेदेखि दर्शकमाझ आउँदैछ । यो फिल्म विषयवस्तु र प्रस्तुतिको हिसाबले केही फरक रहेको निर्माण पक्षले जनाएको छ । सन् १८०० को दशकमा नेपाली समाजमा व्याप्त रहेको र अहिले निकै कम प्रचलनमा रहेको ‘जार’ प्रथालाई मूल विषय बनाएर फिल्म निर्माण गरिएको हो ।

इन्द्रबहादुर राईले आफ्नो कथामा सोही समयको चित्रण गरेको र त्यसैलाई पर्दामा उतार्दा यो करिब २२५ वर्ष पुरानो कथा बनेको निर्देशक फूर्वा छिरिङ लामा बताउँछन् । निर्देशक लामाका अनुसार, ‘जार’ केवल एक फिल्म मात्र नभएर हाम्रो इतिहाससँगको साक्षात्कार, समाजबाट हराउँदै गएका परम्परा र सम्बन्धका विविध पाटा केलाउने माध्यम हो । उनले भने, “मैले सानैदेखि सुन्दै आएको यो कथाले सधैं झक्झकाइ रहन्थ्यो ।

@parikalanewsofficial

नेपाली समाजमा जस्तै नेपाली भाषी समुदायमा जहाँसुकै गए पनि एउटै भावना पाइन्छ ।” उनले थपे, “‘जार’ले हाम्रो समाजको भोगाइ, निर्दोषता र त्यतिबेला प्रचलित मितेरी साइनोलाई समेत उजागर गर्छ ।” यो फिल्मले इतिहास, संस्कृति र समाजलाई गहिरो रुपमा स्पर्श गर्ने भएकाले विशेष गरी युवा पुस्ताका लागि महत्वपूर्ण हुने विश्वास निर्देशक लामाको छ । उनका अनुसार, अहिलेका पुस्तामा यो विषय ओझेलमा परे पनि त्यसबेला समाजमा यसको ठूलो प्रभाव थियो । ‘जार’ले इतिहास सुनाउनुको साथै हाम्रो संस्कृतिको अदृश्य धागो भेटाउने प्रयास गर्नेछ ।

‘जार’ले ‘ठूली’ र ‘रुद्रमान’ पात्रहरूमार्फत एक प्रेमकथा देखाउँदै तत्कालीन समाजको संरचना र मानव भावनाको जटिलतालाई पर्दामा उतार्नेछ । दर्शकले त्यसबेलाको प्रेम, सम्बन्ध र समाजको कठोर वास्तविकता महसुस गर्न सक्नेछन् । फिल्ममा देखाइने ‘मितेरी साइनो’ जस्ता सामाजिक परम्पराहरू अहिलेका नयाँ पुस्ताका लागि नौलो हुन सक्छन्, जसले पुरानो समाज र आजबीचको गहिरो सम्बन्ध बुझ्न मद्दत पुर्‍याउनेछ ।

फेरि टेल पिक्चर्सले निर्माण गरेको ‘जार’ सामाजिक विषयमा केन्द्रित भए पनि यो एक ‘कम्प्लिट प्याकेज’ भएको निर्देशक लामाको दाबी छ । त्यसैले फिल्मले दर्शकको मन जित्नेमा उनी ढुक्क छन् । फिल्ममा अभिनेता सौगात मल्ल, अनुपविक्रम शाही, अभिनेत्री गीताञ्जली थापालगायत कलाकारहरूको मुख्य भूमिका रहेको छ । होप रिल्स, एलए सेभेन सर्टस, बराल स्टुडियो र किवा प्रोडक्सनको सहकार्यमा निर्माण भएको यो फिल्मको छायांकन भारतको सिक्किममा गरिएको छ ।

फिल्मका कार्यकारी निर्माताहरूमा त्रिलोचन पाण्डे, नीरज राई, नुर्साङ भुटिया, ज्योती क्षेत्री र पेमा रिन्जिङ लेप्चा रहेका छन् ।
सरवानन इलावार्सुले छायांकन गरेको यस फिल्ममा अखिलेश राईको सम्पादन रहेको छ । फिल्ममा झुमा लिम्बू र गंगा थापाको संगीत सुन्न सकिनेछ । नेपाल र भारतसहित अन्तर्राष्ट्रिय बजारमा एकसाथ प्रदर्शनमा आउने ‘जार’ को नेपालभित्र वितरणको जिम्मा एप्पल इन्टरटेन्मेन्ट, रीच इन्टरटेन्मेन्ट र एफडी कम्पनीले लिएका छन् भने अन्तर्राष्ट्रिय वितरकको रूपमा सेभेन सिज सिनेमा रहेको छ ।