इटहरी/ चर्चित एक्सन अभिनेता तथा निर्देशक निखिल उप्रेती यतिबेला आफ्नो महत्वकांक्षी प्रोजेक्ट ‘आचार्य’ फिल्मको तयारीमा व्यस्त छन् । एक्सन जनरामा केही नयाँ गर्ने लक्ष्य लिएका निखिलको यही प्रतिक्षित फिल्ममार्फत म्युजिक भिडियोमा आफ्नो छुट्टै पहिचान बनाएकी लोकप्रिय मोडल उषा उप्रेतीले ठूलो पर्दामा डेब्यु गर्ने पक्का भएको छ । फिल्म ‘आचार्य’ मा आफू अनुबन्धित भएको खबर उषाले आफैंले सामाजिक सञ्जालमार्फत पुष्टि गरेकी हुन् ।
निर्देशक तथा निर्माता समेत रहेका निखिल उप्रेती र अभिनेत्री सञ्चिता लुइँटेलसँगको तस्विर सेयर गर्दै उषाले आफ्नो फिल्मी यात्राको सुरुवातबारे जानकारी दिएकी छिन् । उक्त तस्विरसँगै उनले लेखेकी छिन्, ‘नयाँ यात्रा सुरु हुन्छ । साहसिक यात्रा पर्खिरहेको छ ।’ उनको यो पोस्टले उनी आफ्नो डेब्युलाई लिएर निकै उत्साहित रहेको देखाउँछ ।
म्युजिक भिडियोमा दशकौंदेखि सक्रिय र चर्चित रहे पनि उषाको यो पहिलो फिचर फिल्म हुनेछ । यद्यपि, ‘आचार्य’ मा उनको भूमिका कस्तो हुनेछ वा उनको चरित्रलाई कसरी प्रस्तुत गरिनेछ भन्ने बारेमा भने निर्माण पक्षले हालसम्म केही खुलाएको छैन ।
निखिल उप्रेतीले यो फिल्मलाई आफ्नो ‘ड्रिम प्रोजेक्ट’ भन्दै यसमा निकै मेहनत गरिरहेका छन् । उनले गत चैत महिनामा नै फिल्म निर्माणका लागि इजाजत लिइसकेका थिए ।
@parikalanewsofficial
फिल्मको निर्देशन र निर्माणको जिम्मेवारी निखिलले आफैं सम्हालेका छन् । ‘आचार्य’ एक भव्य एक्सन फिल्म हुने बलियो संकेत निखिलकै निर्देशन तथा निर्माण रहने भएको कारण मिलेको छ । हालै निखिल पोखराको साराङकोटस्थित प्याराग्लाइडिङ गर्ने ठाउँमा लोकेसन हेरिरहेको भिडियो सार्वजनिक भएको थियो । यसले फिल्ममा उच्चकोटीका एरियल एक्सन दृश्यहरु रहने सम्भावनालाई बढाएको छ ।
यदि यसो भएमा, नेपाली पर्दामा यो एक बहुप्रतिक्षित र नयाँ स्वादको एक्सन फिल्म बन्न सक्छ । यसका लागि निखिलले दक्षिण भारतीय फिल्मका एक्सन कोरियोग्राफरसँग समेत सहकार्य गर्ने तयारी गरेको बुझिएको छ । निर्माण पक्षका अनुसार, फिल्मको छायांकन कार्य आगामी जेठ महिनाबाट सुरु गर्ने तयारीमा रहेको छ । निखिल उप्रेतीको महत्वकांक्षी प्रोजेक्टबाट म्युजिक भिडियोकी लोकप्रिय मोडल उषा उप्रेतीले गर्ने डेब्युलाई लिएर फिल्म वृत्त तथा दर्शकमा उत्साह देखिएको छ ।
Discussion about this post