फिल्म ‘कोशेढुङ्गा’को फर्स्ट लुक्स सार्वजनिक, भदौ १२ गते प्रदर्शन तय

इटहरी/ प्रतिक्षित नेपाली फिल्म ‘कोशेढुङ्गा’ले आफ्नो प्रदर्शन मिति घोषणा गर्दै फर्स्ट लुक्स सार्वजनिक गरेको छ । निर्माणपक्षले एक कार्यक्रमका बीच फिल्मको पोस्टर बाहिर ल्याएको हो, जसमा मुख्य अभिनेत्री सुरक्षा पन्त फिचर्ड छिन् । अब यो फिल्म आगामी भदौ १२ गतेदेखि नेपाल सहित अन्य देशमा एकसाथ रिलिज हुनेछ । सार्वजनिक पोस्टरमा अभिनेत्री सुरक्षा पन्त ओड्ने ओडेर पछि फर्किएर हेरिरहेको अवस्थामा देखिन्छिन् । उनको गेटअपले उनी नवविवाहित भएको सङ्केत दिन्छ । उनी पहाडको रमणीय पृष्ठभूमिमा रहेको एक घरको आँगनछेउमा उभिएकी छिन् ।

आँगनमा देखिएको झारले घर केही समयअघि छोडेर हिँडेको जस्तो देखिए पनि धेरै पुरानो भने नदेखिने अनुमान गर्न सकिन्छ । पोस्टरमा पहाडको फेदीमा रहेको घर धनी व्यक्तिको जस्तो देखिनु र सुरक्षा पन्तको उपस्थिति हेर्दा, केही समयको अन्तरालपछि गाउँ फर्किएकी नवविवाहित महिलाले त्यहाँ केही नयाँ सुरुवात गर्न लागेको हुनसक्ने सामान्य अनुमान लगाउन सकिन्छ । यद्यपि, फिल्मको कथावस्तुबारे निर्माण पक्षले विस्तृत जानकारी दिएको छैन ।

फिल्मका निर्देशक सरोज पौडेलले पोस्टरले कथाका केही पाटा खुलाए पनि अहिले यसलाई यतिमै सीमित राख्ने बताए । उनले आउँदा दिनमा सार्वजनिक हुने अन्य प्रचार सामग्रीमार्फत कथाबारे थप जानकारी दिइने उल्लेख गरे । महिलाप्रधान मानिएको यस फिल्ममा सुरक्षा पन्त मुख्य भूमिकामा छिन् । उनीसँगै आर्यन सिक्देल, नीति शाह, प्रविण खतिवडा, ऋचा शर्मा, सरोज खनाल, विशाल पहाडी, लोकमणी सापकोटा, हिउँवाला गौतम, दिनेश काफ्ले, शेखर चापागाईं, सिरु विष्ट, उद्वव सापकोटा, सविता रेग्मी, सविन कट्टेल, विकास खनाललगायतका कलाकारको अभिनय रहेको छ ।

@parikalanewsofficial

नरदेवी फिल्मसको प्रस्तुति रहेको ‘कोशेढुङ्गा’मा प्रेविल कँडेल र किशोर अनुराग निर्माता छन् भने कार्यकारी निर्मातामा दिनेश खड्का रहेका छन् । फिल्ममा बाबु श्रेष्ठको डीओपी, नहकुल खड्काको सम्पादन तथा आषिश अविरल र रिदम कँडेलको संगीत रहेको छ । फिल्मका कास्टिङ डिरेक्टर सुवलमणि सापकोटा हुन् । ‘पूर्ण बहादुरको सारङ्गी’ जस्तो सफल फिल्म निर्देशन गरिसकेका सरोज पौडेलको निर्देशन रहेको हुनाले ‘कोशेढुङ्गा’लाई प्रतिक्षित फिल्मको रुपमा हेरिएको छ । सरोजको अघिल्लो फिल्मले बक्स अफिसमा नेपालबाट मात्रै करिब ४७ करोड ५० लाख भन्दा बढी ग्रस कलेक्सन गरेको थियो । यसै कारण पनि उनको नयाँ फिल्म कस्तो बन्नेछ भन्नेमा धेरैको चासो रहेको छ ।