‘खेल’को ग्रान्ड प्रिमियरमा ‘हलिउड स्तर’को भन्दै प्रशंसा, भोलिदेखि प्रदर्शनमा आउँदै

इटहरी/ नेपाली फिल्म ‘खेल’ले प्रदर्शनको पूर्वसन्ध्यामा काठमाण्डौमा भव्य ग्रान्ड प्रिमियर आयोजना गरेको छ । भोलि शुक्रवारदेखि देशभर रिलिज हुन लागेको यो मिथिकल सस्पेन्स थ्रीलर फिल्मले प्रिमियरमा उत्कृष्ट प्रतिक्रिया प्राप्त गरेको छ, जसलाई कतिपयले ‘हलिउड स्तर’को भन्दै प्रशंसा गरेका छन् ।
बुधवार साँझ काठमाण्डौंको छाया सेन्टरस्थित क्युएफएक्स फिल्म हलमा आयोजित विशेष प्रिमियर शोमा फिल्मको सम्पूर्ण टिम, पत्रकार, शुभचिन्तक र अन्य चलचित्रकर्मीहरूको बाक्लो उपस्थिति थियो ।

प्रिमियरकै लागि भारतबाट आएका निर्देशक अनुराग प्रधान र अर्की निर्देशक आस्था श्रेष्ठले अतिथिको स्वागत गरेका थिए । निर्देशक प्रधानले बलिउडमा आफूले सिकेको अनुभव र ज्ञानलाई यो फिल्ममा प्रयोग गरेको बताए । प्रिमियरमा उपस्थित फिल्मकी मुख्य अभिनेत्री सुरक्षा पन्तसहित हेना नगरकोटी, मोनिका थापा, निकिता आचार्य, समापिका गौतम लगायतका कलाकारहरूको प्रस्तुतिलाई तारिफ गरियो ।

@parikalanewsofficial

अभिनेत्री पन्तले युवाहरूको सच्चा प्रयासमा बनेको यो फिल्मले सफलता पाउनेमा आफू विश्वस्त रहेको र प्रिमियरमा मिलेको प्रतिक्रियाले टिमलाई थप उत्साहित बनाएको बताइन् । फिल्म ‘खेल’ को कथावस्तु, पटकथा, संवाद, छायाङ्कन, सम्पादन, रङ्ग संयोजन (कलर) र समग्र प्रस्तुतिको टोनको विशेष तारिफ भएको छ । प्रिमियरमा सहभागी दर्शक तथा समीक्षकहरूले नेपाली मिथक, रहस्य र आधुनिक मनोविज्ञानलाई फिल्मले सशक्त र प्रभावशाली ढंगले प्रस्तुत गरेकोमा प्रशंसा व्यक्त गरे ।

मिथिला शर्मा, भोलाराज सापकोटा, सरिता गिरी, किरण श्रेष्ठ जस्ता स्थापित कलाकारहरूको समेत अभिनय रहेको ‘खेल’ लाई अनुराग प्रधान र आस्था श्रेष्ठले संयुक्त रूपमा निर्देशन गरेका हुन् । सिरुपाते कट्स प्रालिको ब्यानरमा निर्माण भएको यो फिल्मका निर्माताहरू लुइसराज महर्जन र आशिषराज महर्जन हुन् भने सह-निर्माताहरू कुणालराज गुरुङ र रहिशराज महर्जन रहेका छन् ।

आशिषराज महर्जनले कथा लेखेको यस फिल्मको पटकथा अभितेन्द्र र अनुराग प्रधानले तयार पारेका छन् । रोशन राई र सञ्जय लामाको छायाङ्कन रहेको ‘खेल’ लाई आशिषराज महर्जनले सम्पादन गरेका हुन् । फिल्मको ध्वनि डिजाइन विकल प्रधान, रङ्ग संयोजन राजेन्द्र मोक्तान, प्रोडक्सन डिजाइन किशोर नेपाल, कस्ट्युम डिजाइन एलेक्स बसुकला र मेकअप दिपु पौडेलले गरेका छन् । डिसिएनले वितरण गर्ने यस फिल्मको पब्लिसिटी डिजाइन ट्राइडेन्ट कन्सेप्टले गरेको हो ।