जेठ २ देखि रिलिज हुने ‘हेल्लो काँशीराम’को गीत सार्वजनिक, प्रियंका र दिलिपको ठुम्का

इटहरी/ नेपाली फिल्म उद्योगमा नयाँ कथावस्तु पस्किने तयारीका साथ फिल्म ‘हेल्लो काँशीराम’ आगामी जेठ २ गतेबाट देशभरका फिल्म हलमा प्रदर्शन हुँदैछ । प्रदर्शन मिति नजिकिँदै गर्दा निर्माण पक्षले फिल्मको प्रचार प्रसारलाई व्यापक बनाउँदै लगेको छ । यसै क्रममा दर्शकमाझ फिल्ममा समावेश गरिएको ‘झ्यामकी मादल झ्याम’ बोलको लोकलयको गीत सार्वजनिक गरिएको छ ।

बुढासुव्वाको अफिसियल युट्युब च्यानलमार्फत रिलिज गरिएको यो गीतमा लोकप्रिय गायक प्रताप दास र सुमधुर आवाजकी धनी मेलिना राईले स्वर दिएका छन् । नरेन्द्र वियोगीको संगीत संयोजनमा तयार भएको यो गीतमा समावेश आकर्षक नृत्यले दर्शकलाई आकर्षित गर्न सक्छ । गीतलाई चर्चित कोरियोग्राफर कविराज गहतराजले निर्देशन गरेका छन् । हेर्नुस् गीतको भिडियो ।

गीतको भिडियो काठमाडौंस्थित बालमन्दिरमा भव्य सेट निर्माण गरी छायांकन गरिएको हो । भिडियोमा अभिनेत्री प्रियंका कार्की, अभिनेता दिलीप रायमाझी, कमेडीयन उमेश राई (फुलन्देको आमा), सुमन खाँड, सरोज केसी लगायतका कलाकारहरुको अभिनय र नृत्य देख्न सकिन्छ । यस गीतको सार्वजनिकसँगै फिल्मले दर्शकको ध्यान अझ बढी तान्न सफल हुने विश्वास निर्माण टिमको छ ।

‘हेल्लो काँशीराम’ को निर्माण रेडलाइन फिल्म्स प्रा.लि.को ब्यानरमा भएको हो । अनुभवी निर्देशक रिम विश्वकर्माले लेखन तथा निर्देशन गरेको यस फिल्ममा पी.बी. थापाको लगानी रहेको छ । निर्माण पक्षका अनुसार यो फिल्मको कुल लागत करिब डेढ करोड रुपैयाँ पुगेको छ । यम आलेको छायांकन रहेको यस फिल्मलाई मित्र डी. गुरुङले सम्पादन र रंग संयोजन गरेका छन् ।

@parikalanewsofficial

फिल्ममा दिलीप रायमाझी, सुरविर पण्डित, रामचन्द्र अधिकारी, शुशिल पोखरेल, उमेश राई (फुलन्देको आमा), भगेरी डन, नवज्योती रसाइली, सुमन खाँण, अजय न्यौपाने, सरोज केसी, उमेश मायालु, विवेश पुरी लगायतका कलाकारहरुको अभिनय देख्न सकिनेछ । निर्देशक रिम विश्वकर्माका अनुसार, अभिनेत्री प्रियंका कार्की यस फिल्ममा एक विशेष र महत्वपूर्ण भूमिकामा प्रस्तुत भएकी छिन् ।