फिल्म जार ‘नेपाली समाजको जीवन्त दस्तावेज पनि हो’ – निर्देशक फुर्वा छिरिङ

इटहरी/ नेपाली फिल्म उद्योगलाई नयाँ उचाइमा पुर्‍याउने लक्ष्यसहित फिल्म ‘जार’ यही वैशाख २६ गतेबाट प्रदर्शनमा आउने भएको छ । फेरि टेल पिक्चर्सद्वारा निर्मित यो फिल्म साहित्यकार इन्द्रबहादुर राईको ऐतिहासिक कथामा आधारित छ, जसले सन् १८०० को दशकको नेपाली समाजको यथार्थ घटनालाई पर्दामा उतार्ने प्रयास गरेको छ ।

निर्देशक फूर्वा छिरिङ लामाले ‘जार’लाई विषयवस्तु, प्रस्तुति र प्राविधिक पक्षमा उत्कृष्ट बनाउन कुनै कसर बाँकी नराखिएको बताए । “यो फिल्मले हरेक नेपाली समाजको कथालाई प्रतिनिधित्व गर्छ । हामीले सिनेम्याटिक स्वतन्त्रता लिँदै इन्द्रबहादुर राईको कथालाई भिजुअल भाषामा थप प्रभावकारी बनाएका छौँ,” उनले भने । “यो केवल फिल्म होइन, नेपाली समाजको जीवन्त दस्तावेज पनि हो ।”

फिल्ममा सौगात मल्ल, अनुपविक्रम शाही र भारतीय राष्ट्रिय फिल्म पुरस्कार विजेता अभिनेत्री गीताञ्जली थापासहितका कलाकारहरूको मुख्य भूमिका छ । निर्देशक लामाले कथाको मागअनुसार कलाकार छनोट गरिएको र उनीहरूले कठिन मेहनत गरेको बताए । प्राविधिक उत्कृष्टताका लागि पोस्ट प्रोडक्सनको केही काम भारतमा सम्पन्न गरिएको छ ।

@parikalanewsofficial

सिक्किममा छायांकन गरिएको ‘जार’मा सरवानन इलावार्सुको छायांकन, अखिलेश राईको सम्पादन र झुमा लिम्बु तथा गंगा थापाको संगीत छ । होप रिल्स, एलए सेभेन सट्र्स, बराल स्टुडियो र किवा प्रोडक्सनको सहकार्यमा बनेको यो फिल्मको कार्यकारी निर्मातामा त्रिलोचन पाण्डे, नीरज राई, नुर्साङ भुटिया, ज्योती क्षेत्री र पेमा रिन्जिङ लेप्चा छन् ।

यो फिल्म ‘जार’ नेपालसहित भारत र अन्तर्राष्ट्रिय बजारमा एकसाथ प्रदर्शन हुनेछ । नेपालभित्र एप्पल इन्टरटेन्मेन्ट, रीच इन्टरटेन्मेन्ट र एफडी कम्पनीले वितरणको जिम्मा लिएका छन् भने अन्तर्राष्ट्रिय वितरण सेभेन सिज सिनेमाले गर्नेछ । निर्माण टिमको दाबीअनुसार ‘जार’ले नेपाली फिल्मलाई नयाँ दिशा दिने र दर्शकलाई एक अविस्मरणीय अनुभव प्रदान गर्ने अपेक्षा गरिएको छ ।