ईटहरी/ नेपाली फिल्म क्षेत्रको बहुप्रतिक्षित मानिएको फिल्म ‘नरसिंहाः अवतार’को गीत ‘अच्छा लेकिन लण्डनको चिसोले समाउला’ गीत रिलिज अगावै चर्चामा आएको थियो । यो गीतको छायांकनपछि सार्वजनीक तस्विरले धेरैमा यो हितप्रति उत्सुकता थियो । यता केहीदिन अघि पोष्टर तथा गीतको सानो क्लिप सार्वजनीक गरिएको थियो भने बुधबार यो गीतको पूरा भिडियो सार्वजनिक गरिएको छ ।
आउँदो जेठ ९ गतेबाट यो फिल्म सार्वजनीक प्रदर्शनमा आउँदै छ । ‘अच्छा लेकिन लण्डनको चिसोले समाउला’ बोलको गीत पुनः रेकर्ड गरिएको गीत हो । यो गीत यसअघि नै निर्माण भएको फिल्म ‘दैव संजोग’को चर्चित गीतको नयाँ संस्करण हो । यो गीतको पहिलो रेकर्डमा गायक शम्भुजित बास्कोटा र गायिका देविका बन्दनाको स्वर थियो । पुनः रेकर्ड गरिएको संस्करणमा भने शम्भुजितसँगै गायिका रचना रिमालको स्वरले गीतलाई नयाँ रंग दिएको छ । हेर्नुस् गीतको भिडियो ।
शम्भुजितकै शब्द र संगीतमा तयार यो गीतको भिडियोलाई कविराज गहतराजको उत्कृष्ट कोरियोग्राफीले थप जीवन्त बनाएको छ । भिडियोको छायांकन राजु विक्रम थापाले र सम्पादन साहिल खानले गरेका छन् । गीतको भिडियोमा फिल्मका मुख्य कलाकारहरू राजेश हमाल, राज कटुवाल, नीति शाह, सनिषा भट्टराई, सरोज खनाल, दीपा शाही, उषा खड्गी र बाल-कलाकारहरू एभेलिना खड्का र समाइरा थापाले नृत्यमा कमाल देखाएका छन् । कविराजको कोरियोग्राफीमा सबै कलाकारको नृत्यले दर्शकको मन जित्ने पक्का छ ।
@parikalanewsofficial
फिल्ममा नीर शाह, अर्जुन श्रेष्ठ, रमेश चन्द सोडारी, आशा पौडेल, प्रशान्त ताम्राकार, राजिभ जंग बस्नेत, प्रकाश जंग कुँवर, प्रभु श्रेष्ठ, अमित गिरी, माइकल घिमिरे, सरोज शाह, किशोर भट्ट, टार्जनलगायतका कलाकारहरूको पनि अभिनय छ । चन्द्र पन्तको कथामा आधारित यो फिल्मलाई दिवाकर भट्टराईले लेखन तथा निर्देशन गरेका छन् । फिल्ममा राजु तामाङको एक्सन निर्देशन, कविराज गहतराज र माइकल चन्दको कोरियोग्राफी, राजु विक्रम थापाको छायांकन, समीर मियाको भीएफएक्स, साहिल खान र मिलन श्रेष्ठको सम्पादनले थप बलियो बनाएको छ ।
क्रियटिभ सिने आर्ट्सको ब्यानरमा नेम महर्जन, दीपक शर्मा ढकाल, नरेन्द्र महर्जन र ध्रुव न्यौपानेको लगानीमा बनेको यो फिल्म नेपाली फिल्म क्षेत्रको लागि ठूलो आशा मानिएको छ । विशेषगरी, नायक राजेश हमालको ८ वर्षपछिको कमब्याकले यो फिल्मको चर्चा चुलिएको छ । यो गीतले फिल्मको हाइपलाई थप उचाइमा पुर्याएको छ । दर्शकहरूले सामाजिक सञ्जालमा गीतको तारिफ गर्दै फिल्मप्रति उत्साह व्यक्त गरिरहेका छन् । ‘नरसिंहाः अवतार’ले नेपाली फिल्मको क्षेत्रमा नयाँ इतिहास रच्ने अपेक्षा गरिएको छ ।
Discussion about this post