फिल्म ‘द महावीर’का लागी नयाँ कलाकारको खोजी

इटहरी/ लक्षरा फिल्सको प्रस्तुतिमा बन्न लागेको नेपाली फिल्म ‘द महावीर’ले विभिन्न भूमिकाहरूका लागि नयाँ कलाकारको खोजी गर्दै कास्टिङ कल गरेको छ । निर्माण टिमले नयाँ अनुहारलाई प्राथमिकता दिने जनाएको छ । फिल्ममा हेरचाह गर्ने भूमिकाका लागि ३० देखि ४० वर्ष उमेर समूहकी जनजाति महिला, २० देखि २५ वर्ष उमेर समूहकी हल्का कालो मुहार भएकी राम्री र नृत्यमा पोख्त कलाकारको आवश्यकता रहेको छ ।

यसैगरी, हल्का कालो छाला भएको मिक्स जनजाति फेस देखिने १० देखि १२ वर्ष उमेरको पुरुष कलाकार, ६ फिट अग्लो र एथलेटिक्स जस्तो शरीर भएको ३५ देखि ४० वर्षको आर्य पुरुष कलाकारको पनि माग गरिएको छ । निर्माण पक्षले ४० देखि ५० वर्ष उमेर समूहकी फ्याट एन्ड लेजी लुक्स भएकी जनजाति महिला, २५ देखि ३० वर्ष उमेर समूहको फिट बडी भएको जनजाति लुक्सको पुरुष, ६ फिट अग्लो फिट एन्ड फाइन देखिने २५ देखि ३० वर्ष (एथलेट्स) को आर्य पुरुषको समेत आवश्यकता जनाएको छ ।

@parikalanewsofficial

यस्तै, बोल्ड एन्ड कमान्डिङ ६० देखि ६५ वर्ष उमेरको जनजाति पुरुष, ५० देखि ६० वर्षको अग्लो र स्वस्थ जनजाति अनुहार भएको पुरुष कलाकारको खोजी गरिरहेको छ भने गोरो छाला भएको दृष्ट र धुर्त देखिने ५० देखि ६० वर्षको आर्य पुरुष कलाकार र स्मार्ट लुकिङ ७ देखि १० वर्ष उमेरको आर्य बालक कलाकारको पनि आवश्यकता रहेको निर्माण टिमले जनाएको छ ।

अनुभवी र नयाँ कलाकार दुवैलाई अवसर दिइने र राम्रो अभिनय गर्नेलाई प्राथमिकता दिइने बताइएको छ । इच्छुक कलाकारले पहिलो चरणमा एक मिनेटको भिडियो वैशाख १ गतेदेखि ३ गतेसम्म पठाइसक्नुपर्नेछ । दोस्रो चरणमा डिजिटल अडिसनबाट छानिएका कलाकारलाई फिजिकल अडिसनका लागि बोलाइनेछ ।

निर्देशक जिबी आग्रीले निर्देशन गर्ने यो फिल्मको कथावस्तु स्पष्ट नपारिए पनि सार्वजनिक थिम पोस्टरले युद्धको पृष्ठभूमिमा आधारित रहेको अनुमान लगाउन सकिन्छ । रातो र गाढा रङ प्रयोग गरिएको पोस्टरमा दुई बलिया घोडा दौडिरहेको र दुई व्यक्ति आमनेसामने भएको देखिन्छ । बीचमा रातो कपडाले बेरिएको ठूलो तरवार कसैले उठाउन लागेको जस्तो देखिन्छ । फिल्मको स्लोगन ‘राइज फाइट कन्क्वेर’ (उठ, लड र जित) ले पनि द्वन्द्वलाई संकेत गर्छ ।

फिल्मको कथा कृष्ण बिके र जिबी आग्रीले लेखेका हुन् । कृष्ण बिके, बिआर रेड्डी र सन्तोष लुहार निर्माता रहेको फिल्ममा रम्भा देवी र लक्ष्मण बिके सह-निर्माता छन् भने वरिष्ठ संगीतकार सुरेश अधिकारी कार्यकारी निर्माताको रुपमा रहेका छन् । सरण रिसीले छायांकनको जिम्मा लिएका छन् । हिन्दी र नेपाली भाषामा निर्माण हुने यो फिल्ममा डल्बी एटमस साउन्ड प्रयोग गरिने निर्माण पक्षले जनाएको छ । फिल्मको प्रदर्शन मिति भने अझै सार्वजनिक गरिएको छैन ।