फिल्म ‘सिटामोल’ साउन २३ गतेदेखि प्रदर्शनमा आउने

इटहरी/ माओवादी जनयुद्धको संवेदनशील कथामा आधारित नयाँ नेपाली फिल्म ‘सिटामोल’ आगामी साउन २३ गतेदेखि प्रदर्शनमा आउने भएको छ । राज बहादुर सानेको निर्देशनमा तयार भएको फिल्मको पोस्टर नयाँ वर्ष २०८२ को अवसर पारेर बैशाख १ गते सार्वजनिक गरिएको हो । सार्वजनिक पोस्टरमा सौगात मल्ल र बेनिशा हमाललाई प्रमुख रुपमा प्रस्तुत गरिएको छ । पोस्टरमा सौगात बैशाखीको सहारामा उभिँदै हातमा रातो भाले समातेको अवस्थामा देखिन्छन् भने छेउमा बेनिशा बच्चा बोकेर मुस्कानका साथ उभिएकी छन् ।

यो दृश्यले उनीहरू श्रीमान-श्रीमतीको भूमिकामा रहेको अनुमान गर्न सकिन्छ । फिल्ममा जनयुद्धको घाइते पात्रको रुपमा सौगात देखिएका छन् भने बेनिशासँगै लोकेन्द्र लेखक, भुगोल कार्की, हिउँवाला गौतम, दिनेश रेग्मी, समिप निरौला, जानुका विश्वकर्मा, आरआर खड्का, ज्ञानु मल्ल, पवन भट्टराई, काजल भुजेल लगायत बालकलाकार करण नेपाली र आराध्या राज्यलक्ष्मी डिसीको पनि अभिनय रहेको छ ।

फिल्म ‘सिटामोल’को कथा प्रदीप भारद्धाज र निर्देशक सानेले लेखेका हुन् । तुल्सी देवी फिल्म प्रालीले जुनतारा फिल्म्सको सहकार्यमा निर्माण गरेको फिल्ममा भुगोल कुमार कार्की र विकाश राज जोशी निर्माता छन् भने अप्सरा नेपाली, अजय मल्ल र कुमार केसी कार्यकारी निर्माता र गंगाराम श्रेष्ठ सहनिर्माताको रुपमा रहेका छन् ।

@parikalanewsofficial

फिल्ममा बाबुल गिरीको संगीत, कविराज गहतराजको कोरियोग्राफी, बन्दे प्रसादको सम्पादन, राजेन्द्र मोक्तानको डिआई कलर, मुकेश शाहको राउण्ड डिजाइन, देव महर्जन र शंकर महर्जनको द्धन्द्व निर्देशन, राकेश दाहालको पोस्टर डिजाइन, विकास तामाङ र धनबहादुर राईको प्रोडक्सन म्यानेजमेन्ट तथा दिव्य सुवेदीको छायांकन रहेको छ । राजनीतिक पृष्ठभूमिमा मानवीय भावना मिसाएर प्रस्तुत गरिएको फिल्म ‘सिटामोल’ले नेपाली दर्शकमाझ फरक स्वाद पस्कने अपेक्षा गरिएको छ ।