सौगात, बेनिशा अभिनित ‘कल्ली’ तिहारपछि कार्तिक २१ गतेबाट प्रदर्शनमा आउने

इटहरी/ फिल्म ‘कल्ली’ आगामी कात्तिक २१ गतेदेखि देशव्यापी रूपमा प्रदर्शनमा आउने भएको छ । हालै फिल्म निर्माण युनिटले रिलिज मिति सार्वजनीक गरेको हो । तिहारको झण्डै दुई सातापछि रिलिज हुने गरी यो फिल्मको प्रदर्शन मिति तय गरिएको हो । निर्माण पक्षका अनुसार काफिया फिल्म्स र कुबेर फिल्म्सले राजधानीसहित मोफसलमा वितरणको जिम्मा लिएका छन् ।

फिल्मका प्रस्तुतकर्ता किरण नेपालीका अनुसार रिलिज मिति वितरकहरूसँग सल्लाह गरेर तोकिएको हो । हाल जुम्लामा छायांकन भइरहेको यो फिल्मको कथा तथा निर्देशन लक्ष्मण सुनारले गरेका हुन् भने निर्माणको जिम्मेवारी हिमाल कडेरिया र अमला देवी राईले लिएका छन् । महेश दवाडीले पटकथा लेखेका फिल्मका कार्यकारी निर्माता सरोज नेपाली हुन् । फिल्म लेकाली इन्टरटेन्मेन्ट र कस्तुरी प्रोडक्सनको प्रस्तुति हो ।

यो फिल्म कल्लीमा कलाकारहरूको लाइनअप निकै रोचक देखिन्छ । सौगात मल्ल, उत्तम प्रधान, अर्पण थापा, बेनिशा हमाल, नाजिर हुसेन, वर्षा राउत, विनोद न्यौपाने, रेयर राई, प्रियना आचार्य, गीता अधिकारी, कुलदीप अधिकारी र बेगम नेपालीको अभिनय यो फिल्ममा रहनेछ । निसाल पौडेलले छायांकन गरिरहेको यस फिल्मको कथावस्तुबारे भने निर्माणपक्षले अहिलेसम्म केही पनि खुलासा गरेको छैन ।