‘नरसिंहाः अवतार’: राज र सनिषाको प्रेमील पोष्टर सार्वजनिक

इटहरी/ नेपाली फिल्म उद्योगमा प्रेम र एक्सनको समिश्रणका साथ प्रदर्शनमा आउन लागेको फिल्म ‘नरसिंहाः अवतार’ युनिटले नयाँ पोस्टर सार्वजनिक गरेको छ । सार्वजनीक पोस्टरमा अभिनेता राज कटुवाल र अभिनेत्री सनिषा भट्टराईलाई प्रस्तुत गरिएको छ । यी २ को रोमान्टिक उपस्थितिका कारण फिल्मले भावनात्मक सम्बन्ध र साहसिक कथावस्तुलाई एउटै फ्रेममा पस्कने संकेत गर्छ ।

आगामी जेठ ९ गतेबाट प्रदर्शनमा आउने तयारीमा रहेको फिल्म ‘नरसिंहाः अवतार’मा राज र सनिषा मुख्य जोडीको रुपमा प्रस्तुत भएका छन् । चलचित्र विकास बोर्डका पूर्व सदस्य समेत रहेका राज कटुवालले यो फिल्मलाई आफ्नो करिअरको टर्निङ प्वाइन्ट बनाउने लक्ष्यसहित मेहनत गरेका छन् । एक्शनमा पकड बनाउँदै उनले राजेश हमालजस्ता दिग्गज कलाकारसँग स्क्रिन सेयर गरेका छन्, जसले फिल्मप्रति थप भरोसा दिलाउँछ ।

यता, ‘१२ गाउँ’बाट सकारात्मक प्रतिक्रिया बटुलेकी सनिषा भट्टराई यो फिल्ममा अझ निखारिएको अभिनयमार्फत दर्शकमाझ उपस्थित हुँदैछिन् । दिवाकर भट्टराइको लेखन तथा निर्देशनमा तयार भएको फिल्ममा दीपक शर्मा ढकाल, नरेन्द्र महर्जन, ध्रुव न्यौपाने र नेम महर्जनको लगानी छ । फिल्ममा राजेश हमाल, सरोज खनाल, निर शाह, नीति शाह, प्रशान्त ताम्राकार, उषा खड्गी, रमेश चन्द सोडारी, राजिभ जंग बस्नेत, प्रकाश कुँवर, दीपा शाही लगायतका कलाकारको अभिनय रहेको छ ।

पोस्टर डिजाइन राकेश दाहालले गरेका हुन् भने छायांकन राजु विक्रम थापा, कथा चन्द्र पन्त, कोरियोग्राफी कविराज गहतराज र माइकल चन्द, एक्सन राजु लामा, सम्पादन मिलन श्रेष्ठ र साहिल खान, संगीत शम्भुजित बाँस्कोटा र अर्जुन पोखरेलको रहेको छ । करण सिंह प्रोडक्सन डिजाइनर र बसन्त अधिकारी एसोसियट निर्देशकको भूमिकामा छन् । पहिलो पोष्टर सार्वजनीकमै चर्चा कमाएको ‘नरसिंहाः अवतार’ले हालै सार्वजनिक पोस्टरमार्फत फिल्म एक्सन, प्रेम र रहस्यात्मक कथा बोकेको संकेत दिएको छ ।