बलिदान फिल्मको लागी निर्माण गरिएको काली मूर्तिमाथि स्थानीयले लगाए डोजर

इटहरी/ केही समयअघि मोरङ्गको हसिना सिमसार नजिकै रहेको खेल मैदानको एकछेउमा बलिदान फिल्मको लागी निर्माण गरिएको काली माताको मुर्तिमाथी स्थानीयले डोजर लगाएका छन् । ४२ फिट अग्लो उक्त कालिमाताको मूर्तिका कारण स्थानीयलाई फुटबल खेल्न अप्ठयारो भएका कारण मूर्ति भत्काइएको बलिदान फिल्मका निर्देशक सन्तोष सेनले बताए ।

सेनका अनुसार स्थानीयहरुले संरक्षण गरेर राख्न नसकेको दुखेसो गरे । आफूहरुले क्षमा पूजा गरेपछि स्थानीयले डोजर लगाएर उक्त कालिमुर्ती भत्काइएको सेनले जानकारी गराए । माटोको भएको कारणले हाललाई त्यतिकै होस्, हावाहुरी र पानीले बिस्तारै गलाउँदै जान्छ र पछि मूर्तिमा प्रयोग भएको अन्य सामानहरू हटाउनु भन्दा स्थानीयले नमानेको सेनले बताए । त्यहा मूर्ति खडा भएपछि त्यो ठाउँ काली चौरको रुपमा परिचित भएको थियो ।

स्थानीयहरूले फिल्म छायाँकनका बेला परीकला न्यूजसँग कुरा गर्दै सो मूर्ति त्यहा स्थापना भैसकेपछि हात्ती गाउँ पस्न छाडेको बताएका थिए । तर, अहिले स्थानीयकै जोडबलमा सो मूर्तिलाई भत्काइएको छ । भगवानको ठूलो मूर्ति भएको कारण त्यसलाई संरक्षण गरेर राख्दा र प्रचारप्रसार गर्दा त्यहाँ पर्यटक समेत आकर्षित हुनसक्ने थियो । जसले त्यहाँका स्थानीयलाई नै लाभ मिल्ने प्रचुर सम्भावनालाई लत्याएर खेल खेल्न असर गरेको भन्दै मूर्ति भत्काउनु पक्कै फलिफापको मार्ग रोजिएको हैन ।